Xitay hökümiti ürümchidiki partlash weqesining sewebini élan qildi

Uyghur aptonom rayonidiki da'iriler, ürümchining senshixangza rayonidiki soda bazirida yüz bergen partlash weqesi, gaz turbisining partlap kétishidin kélip chiqqanliqini élan qildi .Xitay metbu'atliri weqede 2 ademning ölgenlikini, 11 kishining yarilan'ghanliqini xewer qilghan.

Merkizi gérmaniyidiki sherqiy türkistan uchur merkizi, weqede buningdin köp ademning ölgen bolushi mümkinlikini ilgiri sürdi. Biraq, qanchilik ademning ölgenlikini tilgha almidi. Weqede yarilan'ghanlar aptonom rayonluq 2 - doxturxanigha yatquzulghan. Amma doxturxanidiki da'iriler ölgenler we yaridarlarning sanini élan qilishtin özini qachurdi. Xitay metbu'atliri ölgenlerning qaysi millet ikenlikini tilgha almidi.

Ürümchi sheherlik partkomning bash katipi xu'ang gongyi, partlash weqesi tebi'iy gaz teminlesh shirkitining bésim tengshesh ponkitida yüz bergen bolup, bu jay rabiye qadir soda sariyining udulidiki yöjinggeyge baridighan kochining yer astigha toghra kélidiken.

Partlash toqquz kwadirat métir chongliqtiki bir azgalni peyda qilghan. Xu'ang gongyi partlashning gaz chiqip kétishtin kélip chiqqanliqini bildürgen. Gazning qandaq qilip chiqip ketkenliki téxi tekshürülmektiken.

Bezi xewerlerde ilgiri sürüshiche, partlash weqesi yüz bergende xitay ishchilar yer astidiki gaz yolida meshghulat élip bériwatqan iken. Weqe yüz bergendin kéyin saqchilar jenubiy qowuq, döng köwrük shundaqla shixaba tereplerge ötüdighan yollarni 2 sa'ettek qamal qilghan. (Erkin)