Küytongda yüz bergen paxta weqeside saqchilar qolgha élin'ghan paxtikarlarni urghan


2007.10.05

Uyghur aptonom rayonining küytong shehiridiki bingtüen127 ‏- polkida yüz bergen xitay paxtikarlar bilen qoralliq saqchilar arisidiki toqunushta qolgha élin'ghan tutqunlar, ten jazasigha uchrighanliqini bildürdi. Birleshme axbarat agéntliqining xewer qilishiche, toqunushta qolgha élin'ghan jung chéng isimlik 38 yashlardiki bir xitay paxtikar, weqening 22 ‏- séntebir küni yüz bergenlikini we weqede özining inisi bilen birge saqchilar teripidin saqchi ponkitigha élip bérilip, u yerde 4 kün tutup turulghanliqini we bu jeryanda qoligha ishkel sélip yerge tizlandurup qoyulghanliqini bildürgen.

Jung chéngning eskertishiche, saqchilar uning inisini qattiq uruwetkenliktin yarilan'ghan. U, bu toqunushta 29 kishining qolgha élin'ghanliqini bildürdi. Merkizi xongkongdiki junggo démokratiye we kishilik hoquq uchur merkizi, weqede 25 kishining qolgha élin'ghanliqini we tutqunlarning hemmisi uzun ötmey qoyup bérilgenlikini xewer qilghan idi. Bingtüen da'iriliri deslepte saqchilar bilen paxtikarlar arisida toqunush yüz bergenlikini étirap qilishtin özini qachurghan bolsimu, lékin jüme küni bingtüen 7 - diwiziyiside turushluq qoralliq saqchi etritining bir emeldari birleshme axbarat agéntliqigha bergen uchurida toqunush yüz bergenlikini we toqunushning paxta bahasidiki talash ‏- tartishtin kélip chiqqanliqini bildürgen. Bu emeldarning eskertishiche, munasiwetlik da'iriler weqeni tekshürmekte iken.

Lékin xitay da'irilirining bu türdiki weqelerni bir terep qilish usulini tenqid qilghuchi zatlar , da'irilerni Uyghurlargha qosh ölchem qollinish bilen tenqidlep, xitay köchmenlirige chétilidighan weqelerde özini tutuwalsa, Uyghurlargha chétilidighan adettiki weqelerni shiddetlik basturiwatidu, dep eyiblimekte. Bingtüenining küytongdiki 127- polkida yüz bergen bu weqege saqchilar xitay köchmenlirining kéwizini erzan bahada sétip bermekchi bolghanliqi seweb bolghan. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.