100 Ming kishilik paxta térish qoshuni Uyghur élige kélishke bashlidi

Shinxu'a torining seyshenbe künidiki xewiridin melum bolushiche, chongchingdin Uyghur élige kélip paxta térishqa qatnashmaqchi bolghan 100 ming kishilik pesillik ishlemchi qoshunni toshuydighan mexsus poyiz liniyisining birinchi qétimliqi, nechche minglighan xitay ishlemchini élip Uyghur élige qarap yolgha chiqqan.

20-Awghust Uyghur élige qarap yürüsh qilghan bu chongchingliq xitaylar , Uyghur élining her qaysi ishlepchiqirish qurulush armiyisi diwiziyilirining kéwezliklirige taraydu. Bu yil chongchingdin Uyghur élige kélip paxta térish emgikige qatnishidighan xitaylargha xitay hökümiti , qatnash heqqini kötürüwétish, künlikige ikki yüendin turmush yardem puli bérish dégendek bir qatar étiwar bérish siyasetliri chiqarghan idi.

Uyghur élining yerlik xewer torlirida bérilgen xewerlerge qarighanda bu yil Uyghur élige kélidighan pesillik paxta tergüchiler xitayning bashqa ölkiliridinmu kélidighan bolup , 19- awghust küni gensu, shendong qatarliq jaylardin birinchi türkümde 140 tin artuq xitay paxta tergüchi poyiz arqiliq korligha yétip kelgen. Ular bayin'ghulin oblastidiki her qaysi paxta ishlepchiqirish bazilirigha tarqalghan.

2006- Yili chongchingda yüz bergen qurghaqchiliq apitidin xitay déhqanlarni qutquzush üchün shu yili oxshash mezgilde yüz ming déhqan Uyghur élige paxta térishqa orunlashturulghan idi , shundin étibaren chongchingdin her yili 100 ming xitay Uyghur élige paxta térishqa kelmekte. Xitay hökümitining her yili Uyghur élige xitay ishlemchilerni yötkep ishqa orunlashturuwatqan bir peytte eksiche bolsa Uyghur ishsiz yashlirini bolupmu qizlarni xitay ölkilirige türkümlep ishlemchilikke yötkesh siyasiti Uyghurlarda guman hem naraziliq peyda qilmaqta.(Gülchéhre)