Sherqiy türkistan uchur merkizi xitayning tughut siyasitini tenqid qildi

Bash shitabi gérmaniyidiki sherqiy türkistan uchur merkizining bildürüshiche, xitay hökümiti Uyghurlarning nopusini kontrol qilish üchün, bala sanini pilandin ashuruwetmigen Uyghurlargha her ayda 10 som mukapat bermekte. Xitay hökümiti buni salametlikni saqlash puli, dep atighan.

Uchur merkizining ashkarilishiche, béyjing hökümiti yéqinda Uyghur ilidiki pilanliq tughut xizmiti üchün, 15 milyon yü'en pul ajratqan shundaqla mexsus höjjet chüshürüp, sheherdiki Uyghurlarning ikki, yézidiki Uyghurlarning 3 din artuq perzent almasliqigha kapaletlik qilishni telep qilghan. Sherqiy türkistan uchur merkizi, düshenbe küni teywen merkizi axbarat agéntliqigha bergen melumatida, yuqiriqi tüzümge boysun'ghanlar, "sherep guwahnamisi" bilen her ayda 10 som yardem puligha érishidighanliqini bildürdi.

Sherqiy türkistan uchur merkizining ashkarilishiche, xitay hökümiti yéngi toy qilghan yashlarni3 yilghiche perzent körmeslikke qistimaqta shundaqla birinchi perzenti 3 yashqa kirmigüche 2 - perzentige hamildar bolushni cheklimekte. Sherqiy türkistan uchur merkizi, san – sanaqsiz Uyghur bowaqning qosaqta mejburi qirdurulghanliqini bildürdi. Xitay hökümiti 1987 - yili Uyghur ilida pilanliq tughut siyasitini yolgha qoyushqa bashlighan. 17 Yil mabeynida Uyghur ili pilanliq tughut siyasitining eng qattiq élip bérilghan rayonigha aylandi. Sherqiy türkistan uchur merkizi, xitay hökümitini musulmanlarning örp - aditige hörmet qilip, Uyghurlargha mejburi pilanliq tughut siyasiti yüzgüzmeslikke chaqirghan. (Erkin)