Хитай пиланлиқ туғут сияситини күчәйтмәктә


2006.04.06

Хитай һөкүмити уйғур елидә пиланлиқ туғут сияситини күчәйтиш үчүн һәрикәт башлиған болуп, тәңритағ ториниң 6 ‏-април күнидики хәвиридә, уйғур аптоном районида туғут йешидики аяллар нисбитиниң хитай бойичә оттуричә сәвийидин хели юқири орунни игиләйдиғанлиқи оттуриға қоюлған.

Хитай хәвәр агентлиқи, уйғур аптоном район омумий нопусиниң 2001 ‏- йилидики 18 милйон 761 миң 900 дин көпийип 20 милйон 103 миң 500 адәмгә йәткәнликини , бәш йилда 1 милйон 341 миң 600 адәм , оттура һисап билән һәр йили 268 миң 300 адәм көпәйгәнликини илгири сүргән.

Хитай даирилири, уйғур аптоном районида нопусниң башқа районларға қариғанда наһайити тез сүрәттә көпийиватқаниқини тәкитләш арқилиқ, бу районда пиланлиқ туғут сияситини давамлиқ күчәйтиш керәкликини оттуриға қоймақта, әмма уйғур сиясий тәшкилатлири, хитай һөкүмитиниң уйғурлар арисида пиланлиқ туғут сияситини рәһимсизләрчә елип бериватқанлиқини , нопусниң көпийишигә көчмән хитайларниң сәвәбчи болуватқанлиқини ашкарилимақта.

Мәшһур кишилик һоқуқ паалийәтчиси, уйғурларниң мәнивий аниси рабийә қадир ханим, хитай һөкүмитиниң пиланлиқ туғут сиясити һәққидә мәхсус доклат һазирлап, америка вә яврупа дөләтлиригә бу һәқтә әң йеңи мәлуматларни йәткүзгән , униң билдүрүшичә, хитай һөкүмити нөвәттә һәтта туғулушқа аз қалған, 7 ‏-‏ 8 айлиқ бовақларниму нопусдин сирт төрәлгән дегән баһанә билән елип ташлайдикән. Чәт йеза‏- кәнтләрдә бу хил әһвал техиму еғир болуп, һечқандақ тиббий саватқа игә болмиған кишиләр, пиланлиқ туғут ишханисиниң дохтури сүпитидә туғут опиратсийисигә қатнишип, яш уйғур аяллириға паҗиәлик ақивәтләрни елип кәлгән. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.