Хитай һөкүмити пиланлиқ туғут сияситини қайта тәкитлимәктә


2006.05.01
Share on WhatsApp
Share on WhatsApp

Хитай дөләтлик нопус вә пиланлиқ туғут комитетиниң мудири җаң вечиң, хитай һөкүмитиниң пиланлиқ туғут сияситини изчил давамлаштуридиғанлиқини, бу қанунға хилаплиқ қилғанларни җазалайдиғанлиқини билдүрди. У "әмәлийәт" жорнили мухбири билән өткүзгән сөһбитидә, пиланлиқ туғут сияситиниң иҗабий нәтиҗиләр яритиватқанлиқини тәкитлигән.

Шинхуа агентлиқиниң хәвәр қилишичә, һөкүмәт йезиларда бир балиси яки икки қизи бар аилиләргә йилида 1200 йүән мукапат пули беридикән. Җаң, һөкүмәтниң пиланлиқ туғут сияситини әмәлгә ашурушта, һәм мукапатлаш һәм җазалаш усулини ишлитиватқанлиқини билдүрди.

Хитай һөкүмити тәрипидин елип бериливатқан пиланлиқ туғут сиясити хәлқара кишилик һоқуқ тәшкилатлири болупму чәтәлләрдә паалийәт елип бериватқан уйғур тәшкилатлириниң қаттиқ тәнқидигә учримақта. Хәлқара кишилик һоқуқ тәшкилатлири хитай һөкүмитиниң бу сиясәтни наһайити қаттиқ қоллуқ билән йүзгүзүватқанлиқини тәкитлисә, уйғур тәшкилатлири буни хитай һөкүмитиниң уйғурларға қаратқан ирқий қирғинчилиқ сияситиниң бир қисми дәп қаримақта.

Уйғурлар тәрипидин уйғур миллий һәрикитиниң рәһбири дәп аталған, рабийә қадир ханим, 18 ‏- вә 19 ‏- април күнлири америка дөләт мәҗлисидә өткүзүлгән гуваһлиқтин өтүш йиғинлирида, хитайниң уйғур елидә йүргүзүватқан пиланлиқ туғут сияситини қаттиқ тәнқид қилип, хитай һөкүмитиниң бир тәрәптин хитайниң ички өлкилиридин уйғур елигә хитай йөткәш, йәнә бир тәрәптин пиланлиқ туғут сияситини қаттиқ қоллуқ билән йүргүзүш арқилиқ, уйғурларни өз юртида азсанлиқ милләткә айландуриватқанлиқини билдүрди.

Хитай һөкүмитиниң пиланлиқ туғут сияситини, бу дөләтниң уйғурларға қаратқан ирқий қирғинчилиқиниң бир қисими дәп көрсәткән рабийә қадир ханим, хитай һөкүмитиниң уйғурларниң диний етиқад вә миллий өрп-адәтлиригә пүтүнләй хилап болған пиланлиқ туғут сияситини дәрһал тохтитиши керәкликини билдүрди. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.