Хитай пиланлиқ туғут сияситидики мукапатлаш түзүмини йәниму кеңәйтмәктә

Хитай һөкүмити уйғур елидә, пиланлиқ туғут сияситиниң техиму кәң нәтиҗә көрситишини қолға кәлтүрүш үчүн , пиланлиқ туғут хизмитидә илғар колликтип вә илғар шәхс болуп баһаланғучиларни иқтисадий җәһәттә мукапатлаш түзүмини йолға қоюш чарисини һәммә җайға кеңәйтишкә башлиди.

Хитай хәвәр вастилириниң бүгүн ашкарилишичә, бу йил бүгүр наһийиси пиланлиқ туғут хизмити үчүн 3 милйон 450 миң йүән мәбләғ селип, " аз туғуп тез бейиш" тики 239 аилиниң һәр биригә 3000 йүән, " икки хил гуваһнамә " алған 99 аилигә 112 миң йүән мукапат пули тарқатқан.

Буниңдин башқа, һөкүмәткә һәмкарлишип, туғут чәкләш опиратсийигә қатнашқан туғут йешидики аялларниң дохтурханида йетип давалиниши үчүн 300 йүән толуқлима пули бәргән. Туғут сияситигә әмәл қилған 85 аилигә йәр тәврәшкә чидамлиқ бихәтәр өй селип бәргән . Уларниң баян қилишичә , пиланлиқ туғут комитетиниң юқириқи хизмәтлири нәтиҗисидә наһийә буйичә ялғуз пәрзәнтлик болуш гуваһнамиси алған аилә 3 миңдин ашқан .

Хитайда аз санлиқ милләт қатарида саниливатқан уйғурларға пиланлиқ туғут сиясити иҗра қилишниң, уйғурларни йоқ қилиш мәқситини ишқа ашуруш үчүн икәнликини билдүргән уйғур америка кишилик һоқуқ фонди җәмийитиниң пиланлиқ туғутқа қарши программисида, " аз пәрзәнт туғуп, тез бейиш" ниң пүтүнләй сахта тәшвиқат икәнлики, хитайниң муддиаси уйғурларни бейитиш әмәс, бәлки бир милләтни йоқ қилиш икәнлики пакитлиқ дәлил ‏- испатлар билән оттуриға қоюлған. (Әқидә)