Xitay pilanliq tughut siyasitidiki mukapatlash tüzümini yenimu kéngeytmekte

Xitay hökümiti Uyghur élide, pilanliq tughut siyasitining téximu keng netije körsitishini qolgha keltürüsh üchün , pilanliq tughut xizmitide ilghar kolliktip we ilghar shexs bolup bahalan'ghuchilarni iqtisadiy jehette mukapatlash tüzümini yolgha qoyush charisini hemme jaygha kéngeytishke bashlidi.

Xitay xewer wastilirining bügün ashkarilishiche, bu yil bügür nahiyisi pilanliq tughut xizmiti üchün 3 milyon 450 ming yüen meblegh sélip, " az tughup téz béyish" tiki 239 a'ilining her birige 3000 yüen, " ikki xil guwahname " alghan 99 a'ilige 112 ming yüen mukapat puli tarqatqan.

Buningdin bashqa, hökümetke hemkarliship, tughut cheklesh opiratsiyige qatnashqan tughut yéshidiki ayallarning doxturxanida yétip dawalinishi üchün 300 yüen toluqlima puli bergen. Tughut siyasitige emel qilghan 85 a'ilige yer tewreshke chidamliq bixeter öy sélip bergen . Ularning bayan qilishiche , pilanliq tughut komitétining yuqiriqi xizmetliri netijiside nahiye buyiche yalghuz perzentlik bolush guwahnamisi alghan a'ile 3 mingdin ashqan .

Xitayda az sanliq millet qatarida saniliwatqan Uyghurlargha pilanliq tughut siyasiti ijra qilishning, Uyghurlarni yoq qilish meqsitini ishqa ashurush üchün ikenlikini bildürgen Uyghur amérika kishilik hoquq fondi jem'iyitining pilanliq tughutqa qarshi programmisida, " az perzent tughup, téz béyish" ning pütünley saxta teshwiqat ikenliki, xitayning muddi'asi Uyghurlarni béyitish emes, belki bir milletni yoq qilish ikenliki pakitliq delil ‏- ispatlar bilen otturigha qoyulghan. (Eqide)