Qanas chet'ellik sayahetchiler bérishqa tégishlik jay dep bahalinip, altun mukapatqa érishti

Uyghur diyardiki qoghdilidighan sayahet orunliridin biri bolghan qanas köli, xitay boyiche chet'ellik sayahetchiler bérishqa tégishlik 50 jay tizimlikige kirip, musabiqige qatnashturulghandin kéyin altun mukapatqa érishken.

8 ‏- April küni béyjingdiki xelq sariyida mezkür tür boyiche mukapat tarqitish murasimi élip bérilidiken. Xewerlerdin melum bolushiche, sayahetchiler bérishqa tégishlik 50 jay ichidin birni tallap chiqish pa'aliyitige xitayning munasiwetlik rehberliri, her qaysi döletlerning xitayda turushluq elchixana xadimliri, ölke we sheherlerdiki sayahet idariliri, sayahet sahesi boyiche mütexessisler shuningdek namzat qilip körsitilgen orunlarning wekiliridin bolup 800 kishi qatnashqan.

Gerche, qanas köli sayahetchiler bérishqa tégishlik 50 jay ichidin tallinip , altun mukapatqa érishken bolsimu , emma ilgiri qanas kölining muhitini asrash xizmetliri yaxshi ishlenmigenliktin, mezkür jayning muhiti éghir derijide bulghan'ghanliqi ashkarilan'ghan idi.

Istansimizning igiligen melumatliridin qarighandimu, Uyghur diyaridiki sayahet orunliri, pul tépishni meqset qilghan sayahet shirketliri we bu zémin'gha qanunsiz éqip kirgen aqqunlar teripidin weyran qiliwitilgen bolup, qanunsiz aqqunlarning qalaymiqan haywan owlash , qimmetlik dora ösümlüklirini kolash heriketliri tüpeylidin nurghunlighan orman, derya we köller weyran bolghan. (Eqide)