Xitay qanasta amérikining yélowston memliketlik baghchisidinmu chong kölemlik baghche qurmaqchi


2007.10.15

Xitay metbu'atlirining xewer qilishiche, béyjing da'iriliri Uyghur aptonom rayonining qanas menzirilik rayonini kölem jehette amérikining yélowston memliketlik baghchisidinmu chong kölemlik baghche qilip qurup chiqishni pilanlimaqta iken. Hazirqi qanas menzirilik rayonining omumi kölimi 1000 kwadrat kilométir etrapida bolup, shinxu'a axbarat agéntliqi yéngi qurulidighan baghche buningdin 10 hesse chong bolidighanliqini bildürdi.

Amérikining yélowston memliketlik baghchisining omumi kölimi 9000 kwadrat kilométir etrapida bolup, eger qanastiki baghchining kölimi xitay metbu'atlirining déginidek bolsa, qanas memliketlik baghchisining kölimi az dégende 10ming kwadrat kilométirgha yétishi mumkin. Qanas menzirilik rayoni Uyghur aptonom rayonining merkizi ürümchidin 1000 kilométir shimalida bolup, xitay da'iriliri qanas menzirilik rayonini ichkirilik xitay sayahetchilerge échiwétilgendin béri, bu rayon xitay sayahetchiler éqimining hujumigha duch kelmekte.

Shinxu'a axbarat agéntliqining eskertishiche, bu yilning deslepki 10 éyida qanas menzirilik rayonini sayahet qilghan ziyaretchiler 900 minggha yétip, ötken yilning oxshash mezgilige sélishturghanda %32 ashqan. Bu dégenlik her ayda qanas menzirilik rayonini 90 ming adem sayahet qildi, dégenliktur. Bunchilik zor kölemdiki ziyaretchiler éqimi sayahet shirketlirini paydigha érishtürsimu, lékin muhit qoghdighuchilarni endishige salmaqta.

Muhit qoghdighuchilarning eskertishiche, qanas menzirilik rayonining bunchilik zor kölemdiki sayahetchilerni kütüwalidighan asasiy esliheliri yétersiz bolupla qalmay, xitay sayahetchilirining muhit éngi töwen bolghanliqtin, bu menzirilik rayonning muhit we ékologiyisini ongshighili bolmaydighan derijide weyran qiliwétishi mumkin. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.