Алтайдики қар апитидә 9 миңдин ошуқ чарва-мал өлди


2006-01-08
Share

Йеқинқи күнләрдин буян, алтай вилайитидә йүз бәргән еғир қар апити сәвәбидин һазирғичә 9 миң туяқтин көп чарва-мал өлгән. Шундақла һәммә йәрни қар қаплап кәткәнликтин, 300 миң туяқ чарва-малниң йәм тепип йийиши қейинға чүшкәчкә, йәнә давамлиқ чарва-малларниң өлүш әһвали көрилидиғанлиқи мөлчәрләнмәктә.

Хитай хәвәр тор бетиниң мәлуматиға қариғанда, мунасивәтлик орунлар һазир қар апитидә өйсиз қалған чарвичиларниму башқа җайларға йөткигән. Сибирийидин сүрүлгән бу күчлүк соғуқ еқими алтайни мәркәз қилип, чөчәк, ғулҗа вә бөритала қатарлиқ җайларғичә тәсир көрсәткән болуп, 29‏- декабирдин башлап 3-4 күн уда яғқан қар сәвәбидин, һәтта бәзи тағлиқ районлардики қарниң қелинлиғи бир метирдин ешип кәткән. Бу оттура асия билән русийә чегрисидики 20 йилдин буянқи әң начар һава һесаблинидикән.

Бу қетим алтай районида темпиратора әң төвәнлигәндә нөлдин төвән 43 гирадосқа чүшүп қалған. Нөвәттә мунасивәтлик орунлар чарвичиларни орунлаштуруш вә чарва-малларни қутқузуш ишлирини елип бармақта. Шинхуа агентлиқи хитай һөкүмитиниң бу апәт үчүн 3 милйон 800 миң йүән аҗратқанлиқини хәвәр қилди.

Қишта уйғур елидә қар апити пат-пат көрилидиған болуп, 2001 ‏- йили бу йәрдә йүз бәргән қар апитидә тәхминән 130 миң туяқ чарва-мал өлүп қалған иди. Шундақла нәччә йүзгә йеқин кишидә охшимиған дәриҗидә үшшүп қелиш аламити көрүлүп, һәтта бәзилириниң тоңлап қалған бармақлирини кесиветишкә тоғра кәлгән. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт