قار ئاپىتى ۋە سوغۇق تېمپېراتۇرا خىتاي ھەم ئۇيغۇر ئېلىنى پالەچ ھالغا چۈشۈرۈپ قويدى


2008-02-01
Share

خىتاي ۋە ئۇيغۇر ئېلىدە يېقىنقى 22 كۈندىن بېرى داۋاملىشىۋاتقان مىسلى كۆرۈلۈپ باقمىغان قار ئاپىتى ۋە ئاپەت خاراكتېرلىك سوغۇق ھاۋا تېمپېراتۇرىسى يەنە داۋام قىلماقتا. يېقىنقى 50 يىلدىن بېرى مىسلى كۆرۈلۈپ باقمىغان قار ئاپىتى خىتاينىڭ ئون نەچچە ئۆلكە ۋە ئاپتونوم رايونىدا قاتناشنى پالەچ ھالغا چۈشۈرۈپ قويۇپلا قالماي، ئۇيغۇر ئېلىنىڭ جەنۇبىدىكى ۋىلايەتلەردە ئاپەت خاراكتېرلىك ھاۋا رايى كىلىماتىنى كەلتۈرۈپ چىقاردى.

ئۇيغۇر ئىلى يەرلىك مەتبۇئاتلىرىنىڭ ئەسكەرتىشىچە، ئۇيغۇر ئاپتونوم رايونى خەلق ئىشلار نازارىتى قۇتقۇزۇش باشقارمىسىنىڭ مەسئۇلى ئىساق، قەشقەر، خوتەن، ئاقسۇ، بايىنغۇلىن ۋىلايەت ‏- ئوبلاستلىرىنىڭ ئېغىر ئاپەتكە ئۇچرىغانلىقىنى، ئاپەتكە ئۇچرىغانلارنىڭ 340 مىڭغا يېتىدىغانلىقىنى ۋە بىۋاستە ئىقتىسادى زىياننىڭ 158 مىليون يۈەنگە يېتىدىغانلىقىنى ئېلان قىلغان. خىتاينىڭ تەكلىماكان چۆللۈكىدىكى تارىم ھاۋا رايى كۆزىتىش پونكىتى قار ئاپىتىنىڭ تەكلىماكان چۆللۈكىنى قاپلاش دائىرىسى، يېغىش قېلىنلىقى ۋە ھاۋا رايى تېمپېراتۇرىسىنىڭ تۆۋەنلىك دەرىجىسى قاتارلىقلار تارىخىي رېكورت ياراتقانلىقىنى، تەكلىماكان چۆللۈكىدىكى تېمپېراتۇرىنىڭ مىنۇس 32 گرادۇسقا قەدەر چۈشكەنلىكىنى بىلدۈردى.

ب ب س نىڭ ئەسكەرتىشىچە، ھاۋا رايى مۇتەخەسسىسلىرى 2 - ئاينىڭ 8 ۋە 9 - كۈنلىرى ئۇيغۇر ئىلى يەنە يېغىش خاراكتېرلىك سوغۇق ئېقىمنىڭ ھۇجۇمىغا ئۇچرايدىغانلىقىنى بىلدۈرگەن. خىتاينىڭ ئۆلكىلىرىدە بولسا ۋەزىيەت تېخىمۇ ناچار بولۇپ، خەلق ئىشلار مىنىستىرلىقى جۈمە كۈنىگە قەدەر 60 ئادەمنىڭ ئاپەت تۈپەيلى ئۆلگەنلىكىنى ئېلان قىلدى. تۆمۈر يول مىنىستىرلىقىنىڭ ئەمەلدارى جاۋ چۈنلېينىڭ ئەسكەرتىشىچە، 25 يانۋاردىن 31 - يانۋارغىچە 5 مىليون 800 مىڭ يولۇچى پويىز بېكەتلىرىدە توختاپ قالغان. خەلق ئىشلار مىنىستىرلىقى ئاپەت تۈپەيلى كېلىپ چىققان ئىقتىسادى زىياننىڭ 7 يېرىم مىليارد دوللارغا يېتىدىغانلىقىنى جاكارلىدى. (ئەركىن)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت