قاراقاش ناھىيىسىدە ئوتتۇرا مەكتەپ ئوقۇغۇچىلىرىمۇ بۆلگۈنچىلىك سەۋەبىدىن قولغا ئېلىنغان

 تەيۋەن مەركىزى ئاگېنتلىقىنىڭ مۇخبىرى خوتەن ۋىلايىتى قاراقاش ناھىيىلىك ساقچى ئىدارىسىغا ۋەقە ھەققىدە سۈرۈشتۈرۈش ئېلىپ بېرىپ تېلېفۇن ئۇرغاندا، خىتاي ساقچى خادىمى، بۇ يىل 23 ‏ - مارتتا يۈز بەرگەن نامايىشتا قولغا ئېلىنغانلار ئارىسىدا ئوتتۇرا مەكتەپ ئوقۇغۇچىلىرى بار ئىكەنلىكىگە ئىقرار قىلىپ، مەزكۈر دېلونى ئاپتونوم رايونلۇق جامائەت خەۋىپسىزلىك نازارىتىنىڭ بىۋاستە بىر تەرەپ قىلغانلىقىنى بىلدۈرگەن.

ئۇچۇر مەركىزى قاراقاشتا يۈز بەرگەن نامايىشتىن خەۋەردار بىر كىشىنىڭ سۆزىنى نەقىل كەلتۈرۈپ، 23 ‏ - مارتتا يۈز بەرگەن نامايىشنىڭ، ھۆكۈمەت دائىرىلىرىنىڭ يەر ئاستى دىنىي پائالىيەت تەشكىلاتلىرىنىڭ ئوقۇتۇش ئىشلىرىنى چەكلىشى سەۋەبىدىن مەيدانغا كەلگەنلىكىنى، نامايىشتىن بىر كۈن بۇرۇن نارازىلىق بىلدۈرگۈچىلەر بىلەن ساقچىلار ئوتتۇرىسىدا توقۇنۇش يۈز بەرگەنلىكىنى تەكىتلىدى.

23 ‏ - مارت كۈنى، قاراقاش ناھىيىسىدە 500 كىشىلىك نامايىش قوزغالغان بولۇپ، نامايىشچىلار ھۆكۈمەتكە بولغان نارازىلىقىنى بىلدۈرۈش ئۈچۈن تەشۋىق ۋاراقلىرى تارقاتقان. ھۆكۈمەتنىڭ قوراللىق ساقچىلارنى ئىشقا سېلىپ ئېلىپ بارغان باستۇرۇش ھەرىكىتىدە 10 دىن ئارتۇق ئۇيغۇر ئېغىر دەرىجىدە يارىلىنىپ، 30 دىن ئارتۇق ئۇيغۇر قولغا ئىلىنغان ئىدى.