Уйғур аптоном райониниң манас наһийисидә "қара хумдан" паш қилинди


2007-07-06
Share

Хитай мәтбуатлириниң хәвәр қилишичә, уйғур аптоном райониниң манас наһийисидин хитайниң шәнши өлкисидикигә охшаш кишиләрни қуллар әмгикигә салидиған "қара хумдан" байқилип, 3 киши йәрлик җ х органлири тәрипидин қолға елинған.

" Шинҗаң гезити " ниң йеқинқи бир хәвиригә қариғанда манас наһийилик җ х идариси манастики бир " қара хумдан " ни чеқип ташлап, бу йәрдин қанунсиз вастиләр билән әмгәккә селинған 30 дәк кишини қутқузуп чиққан. Хәвәрдә әскәртишичә, хумдандики ишчилар мәҗбурий әмгәккә селинипла қалмай, уларниң кишилик әркинлики чәкләнгән, иш һәққи берилмигән вә нарази болғучилар җисманий кәмситишкә учриған. Хәвәрдә, вәқәгә четишлиқ 3 кишиниң қолға елинғанлиқи, йәрлик әмгәк идарилири ишчиларниң иш һәққини елип беришкә ярдәмлишиватқанлиқи билдүрүлди.

Бу хәвәр җүмә күни "тәңритағ тори"да елан қилинған болсиму, лекин буниңдин 2 күн бурун истансимиз мухбири манас наһийилик җ х идарисиға телефон қилип, мәзкур наһийидә "қара хумдан" паш қилинғанлиқини сориған, әмма җ х идарисидики даириләр буни рәт қилди. Улар "қара хумданни дәмсиз ? бу йәрдә қара хумдан мәвҗүт әмәс " дәп җаваб бәргән.

Манастики " қара хумдан" паш қилиништин бурун, бәзи хитай тор бәтлиридә уйғур аптоном районини яхши билидиған бир қисим хитай зиярәтчиләр, нилқа наһийисиниң шәһәр мәркизидин йирақ бир канда қуллар әмгикигә селинидиған" қара кан"барлиқини паш қилған болсиму, лекин бу хәвәр һазирғичә хитай мәтбуатлириниң диққитини тартмиған. "Җуңго яшлар" гезити соғуқ нуқта һәптилик истониниң сабиқ баш муһәррири ли датоң йеқинда бир мақалә елан қилип, қул ишчилар хитайда мәмликәт буйичә омумйүзлүк мәвҗүт һадисә, дәп көрсәтти. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт