Uyghur aptonom rayonining manas nahiyiside "qara xumdan" pash qilindi

Xitay metbu'atlirining xewer qilishiche, Uyghur aptonom rayonining manas nahiyisidin xitayning shenshi ölkisidikige oxshash kishilerni qullar emgikige salidighan "qara xumdan" bayqilip, 3 kishi yerlik j x organliri teripidin qolgha élin'ghan.

" Shinjang géziti " ning yéqinqi bir xewirige qarighanda manas nahiyilik j x idarisi manastiki bir " qara xumdan " ni chéqip tashlap, bu yerdin qanunsiz wastiler bilen emgekke sélin'ghan 30 dek kishini qutquzup chiqqan. Xewerde eskertishiche, xumdandiki ishchilar mejburiy emgekke sélinipla qalmay, ularning kishilik erkinliki cheklen'gen, ish heqqi bérilmigen we narazi bolghuchilar jismaniy kemsitishke uchrighan. Xewerde, weqege chétishliq 3 kishining qolgha élin'ghanliqi, yerlik emgek idariliri ishchilarning ish heqqini élip bérishke yardemlishiwatqanliqi bildürüldi.

Bu xewer jüme küni "tengritagh tori"da élan qilin'ghan bolsimu, lékin buningdin 2 kün burun istansimiz muxbiri manas nahiyilik j x idarisigha téléfon qilip, mezkur nahiyide "qara xumdan" pash qilin'ghanliqini sorighan, emma j x idarisidiki da'iriler buni ret qildi. Ular "qara xumdanni demsiz ? bu yerde qara xumdan mewjüt emes " dep jawab bergen.

Manastiki " qara xumdan" pash qilinishtin burun, bezi xitay tor betliride Uyghur aptonom rayonini yaxshi bilidighan bir qisim xitay ziyaretchiler, nilqa nahiyisining sheher merkizidin yiraq bir kanda qullar emgikige sélinidighan" qara kan"barliqini pash qilghan bolsimu, lékin bu xewer hazirghiche xitay metbu'atlirining diqqitini tartmighan. "Junggo yashlar" géziti soghuq nuqta heptilik istonining sabiq bash muherriri li datong yéqinda bir maqale élan qilip, qul ishchilar xitayda memliket buyiche omumyüzlük mewjüt hadise, dep körsetti. (Erkin)