Уйғур елидики бир қара хумдан тақиветилди

Җәнубий җоңгу сәһәрлик гезитиниң 17‏- ноябир күни хәвәр қилишичә, хитай даирилири уйғур елидә кичик яштики балилар, мейиплар вә әқли- һуши җайида болмиған кишиләрни қуллуқ түзүми билән, күндә 20 саәт ишләткән бир қара хумданни тақивәткән.

Хәвәрдә ейтилишичә, урумчи әмгәкни күзүтүш гурупписиниң башлиқи лин җоңгиң, мәзкур қара хумдан қанунсиз ишлитилгәнлики һәмдә қанунсиз ишчи ишләткәнлики үчүн тақивитилгәнликини тәкитлигән.

Гезитиниң хәвиригә қариғанда, қара хумдан игилири деһқанларни, кичик балиларни вә мейипларни ишқа елип, уларни әтигән саәт 5тин йерим кичә саәт 2 гичә, күндә 20 саәттин ошуқ ишләшкә мәҗбурлиған.

Җәнубий җоңгу сәһәрлик гезитиниң мәзкур қара хумдандин қичип қутулған, бир ишчиниң сөзлирини нәқил кәлтүрүшичә, хумдан игилири ишчиларниң сирт билән алақә қилишини қаттиқ чәкләп, уларни давамлиқ уруп- қийнайдикән. Шундақла болупму мейипларни тохтимай ишләтсиму, лекин уларниң маашлирини бәрмәйдикән.

Җәнубий җоңгу сәһәрлик гезитиниң билдүрүшичә, хитай даирилири, уйғур елидики бу қара хумданни тақап, хумдан игилиригә ишчиларниң маашлирини бериш тоғрисида буйруқ чүшүргән һәмдә уларниң қанун бойичә җавабкарлиққа тартилидиғанлиқини тәкитлигән.

Хәвәрдә ейтилишичә, уйғур елидики шиннән адвокатлар ширкитиниң, адвукати гән ведоң, өз вақтида ишчиларниң бундақ еғир експилататсийә қилинишиниң алдини алмиғанлиқи үчүн, қанун органлири вә сақчи даирилирини қаттиқ әйиблигән. (Өмәр қанат)