قارىماي ۋاقەسىنىڭ ھەقىقىي ماھىيىتى ئاشكارىلاندى

خىتاي مەركىزى تېلېۋىزىيە ئىستانسىسى مۇخبىرىنىڭ 1994‏- يىلى 12‏-ئاينىڭ 8‏-كۈنى قارىمايدا يۈز بەرگەن 288 ئوقۇغۇچىنىڭ ئۆلۆمىگە سەۋەب بولغان تىياتىرخانىغا ئوت كېتىش ۋەقەسىنىڭ ھەقىقىي ئەمەلىي ئەھۋالى ھەققىدە تەييارلانغان پروگراممىنى توربەتلەردە پاش قىلىشى، بۇ ۋەقە ھەققىدە 12 يىلدىن بېرى يوشۇرۇنغان ھەقىقەتلەرنى ئاشكارىلىدى ھەمدە پۈتۈن خىتايدا چوڭ مۇنازىرە قوزغىدى.

12 يىل بۇرۇن مەزكۇر ۋەقە ھەققىدە خىتاي مەركىزى تېلېۋىزىيە ئىستانسىسىنىڭ مۇخبىرى چەن ياۋۋەن تەرىپىدىن تەييارلانغان لېكىن خىتاي ھۆكۈمىتىنىڭ چەكلىمىسىگە ئۇچرىغان ھۆججەتلىك فىلىمغا قارىغاندا، تىياتىرخانىغا ئوت كەتكەندە، ئاۋال پارتىيە ۋە ھۆكۈمەت ئەمەلدارلىرىنىڭ تىياتىرخانىدىن چىقىشى ئۈچۈن، ئوقۇغۇچىلارنىڭ ئورۇنلىرىدىن تۇرۇشىغا رۇخسەت قىلىنمىغانلىقى، 288 ئوقۇغۇچىنىڭ كۆيۈپ ئۆلۈشىدە مۇھىم رول ئوينىغان.

خىتاي ھۆكۈمىتىنىڭ بۇيرۇقى بىلەن 12 يىلدىن بېرى كۆرستىلمىگەن بۇ ھۆججەتلىك فىلىمنىڭ چەن ياۋۋەن تەرىپىدىن تور بېتىگە قويولغانلىقى، يېقىنقى كۈنلەردە خىتايدا بۇ ۋەقە ھەققىدە يېڭى مۇنازىرىلەرنىڭ باشلىنىشىغا سەۋەب بولغان. بۇ مۇنازىرىلەر خىتاي مەتبۇئاتىنى بۇ ۋەقەنىڭ ھەقىقىي ماھىيىتىنى تۇنجى قېتىم ئېتىراپ قىلىشقا مەجبۇرلىغان.(ئۆمەر قانات)