Хотән қаш тешиниң баһаси алтундин 40 һәссә юқири болмақта

Уйғур ели һәмдә хотәнниң қаш теши сода тор бәтлиридин ашкарилинишичә, нөвәттә хотән қаш тешиниң һәр гираминиң базар баһаси 7594 йүән болуп,һесаблиғанда алтун баһасидин қириқ һәссә юқири икән.

Хотән қаш теши баһаси мушу он йил ичидә барғанчә өсүп нәччә миң һәссә қатланған. Хотән қаш тешиниң йеқинқи он йил җәрянида адәттики кишиләр сетивалалмиғудәк дәриҗидә қиммәт болуп кетишидики асаслиқ сәвәб, кишиләрниң қаш тешиға болған еһтияҗиниң пәвқуладдә ешишидин болмастин, бәлки қаш тешиниң һәддидин зиядә қезилип булаң ‏- талаңға учрап йоқап кетиш гирдабиға келип қалғанлиқидин икән.

Йеқинда хитай мәркизи телевизийиси мухбирлири хотән қаш теши чиқидиған асаслиқ мәнбә болған юруңқаш дәрясида сүрәткә елиш җәрянида, юруңқаш дәря вадисида қаш теши тепиш җәрянида нәччә он километирғичә қезип бузулған дәря вадилирида 100 миңдин артуқ кишиниң қаш теши изләватқанлиқини сүрәткә алған.

Хитай мәркизи телевизийисиниң 28 - өктәбирдики хәвиридә көрситишичә,қаш теши қазғучилар нәччә миңлиған түрлүк топа иттириш машинилири, тракторлар билән дәряниң икки қенини нәччә он метир чоңқурлуқта қалаймиқан қезиш җәрянида дәря вадисиниң екологийилик муһитини еғир бузғунчилиққа учратмақта икән.

Мәлум бир йәрлик қаш теши қазғучисиниң билдүрүшичә, йеқинқи йиллардин бери дәряни шунчилик чоңқур қазсиму қаш теши тапмақ тәс болуп қалған.

Тарихий материялларда көрситилишичә, хотән қаш теши қезиш тарихи йәттә миң йиллар илгири башланған икән. юруңқаш вадисидики йәрлик деһқанлардин игилишимизгә қариғанда, нөвәттә хотәнниң мунасивәтлик даирилири қаш тешини қалаймиқан қезиш һәрикәтлирини тосаш һәққидә мәхсус һөҗҗәтләрни чүшүргән болсиму, хитай өлкилиридин келип мәбләғ селиш арқилиқ йәрлик деһқанларни ишлитип қаш теши байлиқини қезиватқанлар йәнила көп икән. (Гүлчеһрә)