Xoten qash téshining bahasi altundin 40 hesse yuqiri bolmaqta

Uyghur éli hemde xotenning qash téshi soda tor betliridin ashkarilinishiche, nöwette xoten qash téshining her giramining bazar bahasi 7594 yüen bolup,hésablighanda altun bahasidin qiriq hesse yuqiri iken.

Xoten qash téshi bahasi mushu on yil ichide barghanche ösüp nechche ming hesse qatlan'ghan. Xoten qash téshining yéqinqi on yil jeryanida adettiki kishiler sétiwalalmighudek derijide qimmet bolup kétishidiki asasliq seweb, kishilerning qash téshigha bolghan éhtiyajining pewqul'adde éshishidin bolmastin, belki qash téshining heddidin ziyade qézilip bulang ‏- talanggha uchrap yoqap kétish girdabigha kélip qalghanliqidin iken.

Yéqinda xitay merkizi téléwiziyisi muxbirliri xoten qash téshi chiqidighan asasliq menbe bolghan yurungqash deryasida süretke élish jeryanida, yurungqash derya wadisida qash téshi tépish jeryanida nechche on kilométirghiche qézip buzulghan derya wadilirida 100 mingdin artuq kishining qash téshi izlewatqanliqini süretke alghan.

Xitay merkizi téléwiziyisining 28 - öktebirdiki xewiride körsitishiche,qash téshi qazghuchilar nechche minglighan türlük topa ittirish mashiniliri, traktorlar bilen deryaning ikki qénini nechche on métir chongqurluqta qalaymiqan qézish jeryanida derya wadisining ékologiyilik muhitini éghir buzghunchiliqqa uchratmaqta iken.

Melum bir yerlik qash téshi qazghuchisining bildürüshiche, yéqinqi yillardin béri deryani shunchilik chongqur qazsimu qash téshi tapmaq tes bolup qalghan.

Tarixiy matériyallarda körsitilishiche, xoten qash téshi qézish tarixi yette ming yillar ilgiri bashlan'ghan iken. Yurungqash wadisidiki yerlik déhqanlardin igilishimizge qarighanda, nöwette xotenning munasiwetlik da'iriliri qash téshini qalaymiqan qézish heriketlirini tosash heqqide mexsus höjjetlerni chüshürgen bolsimu, xitay ölkiliridin kélip meblegh sélish arqiliq yerlik déhqanlarni ishlitip qash téshi bayliqini qéziwatqanlar yenila köp iken. (Gülchéhre)