Қурбан сәйпидин 13 йилдин бери инисини өлтүргән қатилни җазалиталмиди
2007.09.20
Уйғур аптоном райониниң мәркизи үрүмчидә қурбан сәйпидин исимлик бир уйғур пуқраси, инисини өлтүргәнлики сәвәбидин өлүм җазасиға һөкүм қилинған ву пәмилилик қатилни җазалиталмай яки төләм пулини алалмай 13 йилдин бери дава қилмақта.
Хитай мәтбуатлириниң хәвәр қилишичә, қурбан сәйпидин вә униң аилиси хитай дөләт органлириниң инисини өлтүргән қатилни җазалимай қоюп бәргәнликигә нарази болуп, дөләттин 5 милйон 130 миң йүән иқтисадий , җисманий вә мәнивий зиянни төләп беришни тәләп қилип 13 йилдин бери тохтимай әрз қилған болсиму, лекин һазирғичә униң әрзи бир тәрәп қилинмиған шундақла йеқинда у, уйғур аптоном райони юқири сот мәһкимисиниң дәрвазиси алдиға шикайәтнамә есип, дәрт пәрядини ипадилигән.
Қурбан сәйпидинниң иниси муһәммәд сәйпидин, 1994 -йили 9 - айниң 20 - күни ву явфең исимлик бир хитай тәрипидин өлтүрүветилгән иди. Ву явфең шу күни доллар содиси билән шуғуллинидиған муһәммәтни 60 миң доллар пулум бар, йүәнгә алмаштурмақчи, дегән баһанә билән бир өйгә апарғандин кейин, долларчини өлтүрүветип, униң йенидики 520 миң йүән пулини елип қачқанда тутулуп қалған иди.
Вәқәдин кейин үрүмчи шәһәрлик оттура сот мәһкимиси ву явфеңға өлүм җазаси бәргән, юқири сот мәһкимиси өлүм җазасини тәстиқлиған болсиму, лекин ву явфең узун өтмәй қоюп берилгән. Лекин қурбан сәйпидин инисиниң хун һәққини һазирғичә алалмай кәлгән. Шу сәвәбтин у, дөләттин 5 милйон 130 миң йүән төләм пули тәләп қилмақта. (Әркин)
Мунасивәтлик мақалилар
- Генерал заһир савданофқа матәм мурасими өткүзүлди
- Қаримай вақәсиниң һәқиқий маһийити ашкариланди
- Үрүмчидә башланғуч мәктәп оқуғучилириға һуҗум қилиш вәқәси йүз бәргән
- Уйғур аптоном районида йүз бәргән қатнаш вәқәсидә 10 адәм өлди
- Күйтун шәһиридә йүз бәргән қатнаш вәқәсидә 5 адәм қаза қилди
- Хитай һөкүмити исмайил сәмәтни өлүмгә һөкүм қилди
- Уйғур елидә йәнә бир уйғур яшқа өлүм җазаси берилди