Уйғур елидә һәр күни тәхминән йәттә адәм қатнаш вәқәсидә өлмәктә

Уйғур аптунум раюнлуқ җамаәт хәвпсизлик назаритиниң йеқинда елан қилишичә, бу йилниң алдинқи тоққуз ейида тәхминән һәр күни йәттә адәм қатнаш вәқәсидә өлгән.

Уларниң илгири сүришичә, бу йил 9 - айғичә уйғур елидә җәми 6000 қетимға йеқин еғир қатнаш вәқәлири йүз бәргән болуп, бу вәқәләрдә җәмий 1983 адәм өлгән.

Хитай даирилири қатнаш вәқәлириниң асаслиқи, шопурларниң аптомобилни бәлгиләнгән сүрәттин тез һәйдиши, өлчәмдин артуқ адәм елиши, йүк машинилириға өлчәмдин артуқ мал қачилиши шундақла шопурларниң һәддидин зиядә чарчап кетиши қатарлиқ сәвәбләр түпәйлидин келип чиққанлиқини билдүргән.

Буниң алдида, хәлқара сәһийә тәшкилати билән дуня банкиси бирлишип доклат елан қилип, хитайдики ташйолларниң дунядики әң хәтәрлик ташйол икәнликини, чүнки һәр йили хитайда 250 миң адәмниң қатнаш вәқәсидә өлидиғанлиқини билдүргән иди. Улар шундақла хитайни қатнаш қаидилирини техиму яхши тәртипкә селип, қатнаш вәқәлиригә тез инкас қайтуралайдиған миханизим қурушқа чақирған. (Арзу)