Uyghur élide her küni texminen yette adem qatnash weqeside ölmekte

Uyghur aptunum rayunluq jama'et xewpsizlik nazaritining yéqinda élan qilishiche, bu yilning aldinqi toqquz éyida texminen her küni yette adem qatnash weqeside ölgen.

Ularning ilgiri sürishiche, bu yil 9 - ayghiche Uyghur élide jem'i 6000 qétimgha yéqin éghir qatnash weqeliri yüz bergen bolup, bu weqelerde jem'iy 1983 adem ölgen.

Xitay da'iriliri qatnash weqelirining asasliqi, shopurlarning aptomobilni belgilen'gen sür'ettin téz heydishi, ölchemdin artuq adem élishi, yük mashinilirigha ölchemdin artuq mal qachilishi shundaqla shopurlarning heddidin ziyade charchap kétishi qatarliq sewebler tüpeylidin kélip chiqqanliqini bildürgen.

Buning aldida, xelq'ara sehiye teshkilati bilen dunya bankisi birliship doklat élan qilip, xitaydiki tashyollarning dunyadiki eng xeterlik tashyol ikenlikini, chünki her yili xitayda 250 ming ademning qatnash weqeside ölidighanliqini bildürgen idi. Ular shundaqla xitayni qatnash qa'idilirini téximu yaxshi tertipke sélip, qatnash weqelirige téz inkas qayturalaydighan mixanizim qurushqa chaqirghan. (Arzu)