Хитай қайтидин қаттиқ зәрбә бериш һәрикити елип беришни пиланлимақта

Хитай җамаәт хәвпсизлик министирлиқиниң алий дәриҗилик бир әмәлдари, хитай һөкүмитиниң күнсери көпийиватқан җамаәт тәртипини бузидиған вәқәләргә қарши қаттиқ зәрбә бериш һәрикити пиланлаватқанлиқини билдүрди.

Шинхуа агентлиқиниң хәвәр қилишичә, хитай җамаәт хәвпсизлик министирлиқиниң юқири дәриҗилик бир әмәлдари 25‏- январ күни бейҗиңда өткүзүлгән бир йиғинида, хитайниң хели узундин буян давамлишиватқан иҗтимаий наразилиқ һәрикәтлириниң хәтәрлик бир дәвргә дуч келиватқанлиқини тәкитлигән.

У сөзидә йәнә, террорчилиқ хитай үчүн әң чоң тәһдит дәп көрситиш билән биргә, хитай бихәтәрлик хадимлирини террорлуқ һуҗумлириға қарши һошяр болушқа чақирған. Ройтерс агентлиқиниң билдүрүшичә, хитай җамаәт хәвпсизлик министирлиқи әмәлдариниң юқиридики сөзлири хитай һөкүмитиниң, хитайда күнсери җиддийлишиватқан җәмийәт муқимсизлиқидин қаттиқ әндишә қиливатқанлиқини көрситидикән.

Өткән һәптә хитай җамаәт хәвпсизлик министирлиқи, 2005 ‏- йили бир йил ичидә хитайда җәми 87 миң қетим топилаң, наразилиқ вә намайиш қатарлиқ җамаәт тәртипини бузидиған вәқәләрниң йүз бәргәнликини ашкарилиған.

Хитай һөкүмити йәнә, хитайға қарши террор тәһдитиниң болупму уйғур елидин келидиғанлиқини тәкитләп, уйғур елиниң мустәқиллиқи үчүн күрәш қиливатқан бәзи уйғур тәшкилатлириниң афғанистан вә оттура асиядики радикал диний гуруппилар билән мунасивити барлиқини билдүргән иди. (Әқидә)