Қирғизистанда бир уйғур мусапири хитайға қайтурулуш хәвпигә дуч кәлмәктә


2006.05.02
Share on WhatsApp
Share on WhatsApp

Қирғизистан аманлиқ даирилири тәрипидин бу йил 3 - айда тутуп қелинған исмаил қари исимлик бир уйғур мусапири хитайға қайтурулуш хәвпигә дуч кәлмәктә. Уйғур кишилик һоқуқ тәшкилатлириниң әскәртишичә, әгәр исмаил қари хитайға қайтуруп берилсә тән җазасиға учраш яки өлүм җазасиға һөкүм қилиниш еһтимали бар икән.

Америка уйғур җәмийитиниң ашкарилишичә, әсли юрти қәшқәрдин болған исмаил қари бу йил 3 - айниң 15 - күни айрупиланға олтуруп түркийигә кәтмәкчи болғанда қирғизистан аманлиқ даирилири тәрипидин таможнида тутуп қелинған. Исмаил қариниң адвукатиниң әскәртишичә, қирғизистан даирилири исмаил қарини сахта паспорт ишлитиш билән әйиплигән болуп, һәр вақит хиялға өткүзүп берилиш хәвпи бар, дәп агаһландурған.

Исмаил қари йеқинқи икки айға йәтмигән вақит ичидә оттура асия җумһурийәтлири дөләт аманлиқ даирилири тәрипидин тутуп қелинған 4 -уйғур мусапир болуп һесаблиниду. Бу йил 3- айниң 26 - күни өзбекистан һөкүмити канада тәвәликидики уйғур һүсәнҗан җелилни тутуп қелип һазирғичә қоюп бәрмиди. Буниң сәл алдида қазақистан даирилири йүсүп қадир тохти вә сидиқ абдуқадир исимлик икки уйғур мусапирини тутуп қалған. Хәлқара кәчүрүм тәшкилатиниң әскәртишичә, хитай һөкүмити бу икки кишини өткүзүвелиш үчүн қазақистан даирилириға бесим ишләтмәктә икән.

Исмаил қариниң һазир қәйәрдә тутуп туруливатқанлиқи ениқ әмәс болупла қалмай, қирғизистан һөкүмити уни немә сәвәбтин хиялға өткүзүп бәрмәкчи боливатқанлиқини ашкарилимиған. 2003 - Йили пакистан һөкүмити исмаил сәмәт исимлик бир уйғурни хитайға қайтуруп бәргәндин кейин, үрүмчи шәһәрлик оттура хәлқ сот мәһкимиси уни өткән йили 10 - айда өлүм җазасиға һөкүм қилди. Уйғур мусапирлирини қайтуруш вә уларға өлүм җазаси бериш хәлқара кишилик һоқуқ органлирини әндишигә салмақта. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.