Qazaqistan ali sot mehkimisi bir Uyghur teshkilatining qazaqistandiki herkitini cheklidi

Qazaqistan ali teptish mehkimisi bilen qazaqistan ali sot mehkimisi jüme küni qarar chiqip, sherqiy türkistan islam herikitini öz ichige alghan bezi teshkilatlarni qazaqistanda pa'aliyet élip bérishi cheklinidighan térorchi teshkilatlat dep élan qildi. Qazaqistan ali teptish mehkimisining tizimlikidiki qazaqistanda pa'aliyet élip bérishi cheklen'gen teshkilatlar sherqiy türkistan islam herikitidin sirt, özbékistan islam herikiti, kürdistan ishchilar partiyisi we el qayde teshkilatini öz ichige alidu. Kürdistan ishchilar partiyisi hazirqi kürdistan xelq kon'grisining esli bolup, mezkur teshkilat türkiyining sherqiy jenubidiki kürtlerning musteqilliq dawasini qilatti. Sot mehkimisining qarari boyiche yuqiriqi teshkilatlarning we yaki yuqirqi teshkilatlar bilen alaqidar teshkilatlarning qazaqistanda pa'aliyet élip bérishi cheklinidu.

Biraq sot mehkimisi qazaqistandiki qaysi teshkilat we qandaq teshkilatlarning yuqiriqi teshkilatlar bilen alaqidar teshkilat hisaplinidighanliqini tilgha almighan. Sherqiy türkistan islam herkiti ilgiri qirghizistan, xitay, afghanistan we amérika qatarliq döletlerning telipige asasen b d t xewpsizlik kéngishining térorchi teshkilatlar tizimlikige élin'ghanidi.Biraq qazaqistan ali sot mehkimisi hizbul teqrir partiyisini qazaqistanda cheklinidighan teshkilatlar qatarida tilgha almidi. 11 - Sintebir weqe'isidin kéyin astana da'ilirining qazaqistandiki Uyghurlargha bolghan bésimi téximu éghirlashqan. Qazaqistan hökümiti merkizi alma-atadiki Uyghuristan xelq partiyisini tarqitiwétip, partiye rehbiri qehriman ghojamberdini qanunsiz teshkilat qurush bilen eyipligen idi. (Erkin)