Қазақистан ташқи ишлар министири уйғур аптоном районини зиярәт қилиду


2006.02.20
Share on WhatsApp
Share on WhatsApp

Қазақистан ташқи ишлар министирлиқи баянатчиси йерҗан ашиқбайевниң ашкарилишичә, қазақистан ташқи ишлар министири қасим җүмәрт тоқайев 2- айниң ахирлири уйғур аптоном райониниң мәркизи үрүмчиини зиярәт қилидикән.

Әмма тоқайевниң уйғур аптоном районида елип баридиған зиярити қандақ мәсилиләргә четилидиғанлиқи вә униң үрүмчидә кимләр билән учришидиғанлиқи елан қилинмиди. Қазақистан хитайниң шаңхәй һәмкарлиқ тәшкилатидики муһим шерики шундақла уйғур аптоном райони қазақистанниң хитай билән болған сода - иқтисади вә бихәтәрлик җәһәттики муһим өткили.

Қазақистан һөкүмити шәрқий түркистан күчлириниң қазақистан земинида хитайға қарши паалийәт елип беришиға йол қоймайдиғанлиқи вә қазақистанға қечип чиққан уйғур мусапирлириға хәлқара мусапирлар әһдинамиси бойичә муамилә қилмайдиғанлиқи һәққидә вәдә бәргән. Қазақистан ташқи ишлар министирлиқи баянатчисиниң әскәртишичә, қасим җүмәрт тоқайевниң үрүмчидә елип баридиған зиярити униң 26 - февралдин 1 - мартқичә бейҗиңда елип баридиған зияритиниң бир қисими икән.

Йерҗан ашикбайев дүшәнбә күни астанида елан қилған баянатида, " бу зиярәт хитай баш министири вен җябав, дөләт комисари таң җяшүән вә хитай ташқи ишларминистири ли җавшиңлар билән болудиған учришишларни өз иичигә алиду " деди. Униң әскәртишичә, тәрәпләр хәлқара вә район характерлик мәсилиләр, икки дөләтниң сияси, иқтисади вә мәдәнийәт җәһәттики үз‏ - ара мунасивәтлири бойичә музакирә елип баридикән. Әмма у, музакириниң конкрет мәзмунини ашкарилимиди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.