Uyghur aptonom rayonining nopusi qérilishishqa yüzlenmekte

Xitay metbu'atlirining xewerqilishiche, omumi nopusi 20 milyon, dep élan qilin'ghan Uyghur aptonom rayonida nopusning yash qorami qérilishishqa yüzlenmekte. 2010 - Yilgha barghanda Uyghur aptonom rayonidiki yashan'ghanlar nopusi 220 minggha yétip, omumi nopusning 10 % din köprekini igileydighan bolidu. Buning bilen Uyghur aptonom rayoni nopusning qérilishish dewrige kiridiken.

Shinjang xelq radi'osining ashkarilishiche, rayon nopusining qérishi 2040 -yiligha barghanda eng yuqiri pellige chiqidu. Közetküchilerning eskertishiche, rayon nopusining qérilishishi iqtisadi ehwali ezeldinla ajiz bolghan Uyghur aptonom rayonida puqralarning ijtima'iy yükini téximu éghirlashturuwétishi mümkin.

Uyghur a'ile qurulmisining alahidiliki boyiche alghanda burun köp janliq Uyghur a'ililiride 6 -7 perzent bir jüp ata - anini baqsa, hazirqi 2 perzentlik a'ile qurulmisida 2 yaki 3 adem bir jüp ata - anini béqishqa mejbur bolmaqta.

Shinjang xelq radi'osining eskertishiche, bu ehwalda Uyghur aptonom rayonining yashan'ghanlar ijtima'iy sughurta séstimisi we dawalash sughurta séstimisini mükemmelleshtürüshke toghra kélidu. Emma Uyghur aptonom rayonida hazirghiche salametlik sughurta séstimisi we yashan'ghanlar ijtima'iy sughurta séstimisi shekillinip bolmighan. (Erkin)