Уйғур деһқанларниң аманәт қәрз елишидики қийинчилиқларни асанлаштуруш тәләп қилинди


2005-03-15
Share

Уйғур аптоном районлуқ пул - муамилә назарәт қилиш идарисидики даириләр, аптоном районлуқ йеза аманәт қәрз копиратипиниң бу йилқи әтиязлиқ терилғу үчүн, 6 милярд 100 милйон йүән аманәт қәрз соммиси аҗратқанлиқини елан қилди. Амма бейҗиңда хәлқ қурултийиниң мәмликәтлик йиғиниға қатнашқан уйғур вәкилләр, райондики деһқанларниң аманәт қәрз елиши қийинлиқини оттуриға қойған.

Пул - муамилә назарәт қилиш идарисидики даириләр, йеза аманәт қәрз копиратипиниң сиртида аптоном районниң намратларни йөләш аманәт қәрз соммиси үчүн 150 милйон йүән аҗратқанлиқини шундақла йеза игилик банкисиниң 250 милйон йүән қәрз пул тарқатқанлиқини билдүргән.

юқириқи пуллар уйғур аптоном райониниң җәнубидики 6 вилайәт вә областидики 520 миң намрат нопусниң деһқанчилиқ әшялирини сетивелиши үчүн қәрз берилидикән. Бирақ хитай хәлқ қурултийиниң мәмликәтлик йиғиниға қатнашқан турпан вилайитиниң валиси абдулла қасим, қурултайниң 8 - марттики гуруппа музакирисидә уйғур аптоном районидики "йеза - кәнтләр вә оттура - кичик типтики карханиларниң аманәт қәрз елиш қийинлиқини һәл қилиш" ни тәләп қилған.

Йиғинда хитай дөләт кабинти ғәрбий районни ечиш ишханисиниң муавин башлиқи ваң җиншяң, аманәт қәрз елишниң қийинлиқи " хотән районида әң еғир", дәп тәкитлигән.

Радиомизға телефон қилған уйғур деһқанлар, райондики хитай деһқанларниң аманәт қәрз елиш мәсилисидә һечқандақ тосалғу йоқлиқини билдүрмәктә. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт