Xitay da'iriliri qeshqer 4 - awghust weqesidin kéyin bixeterlikni qayta tekitlimekte
Muxbirimiz gülchéhre xewiri
2008.08.05
2008.08.05
Xewerde olimpik komitéti bayanatchisi sün wéydéning sözini neqil élip körsitishiche, da'iriler béyjing olimpikining bixeter élip bérilish teyyarliqini puxta élip barghan bolup, musabiqe jeryanida her qandaq yüz bérish éhtimalliqi bolghan weqelerge taqabil turushqa kapaletlik qilinidighanliqini bildürgen.
Ürümchidiki memuriy idare - organ hemde asasliq kochilarda her yüz métirda birdin pos turushqa bashlighan bolup, peqet ürümchi sheherlik tengritagh rayoni tewesidila 1155 xadim kochilarni charlimaqta iken. Buning aldida ürümchide kocha aptobusida hemde ammiwi sorunlarda ammining somkisini échip tekshürüsh yolgha qoyulghan idi.
Ürümchi da'iriliridin igiligen uchurlardin ashkarlinishiche, kocha hemde ammiwi sorunlargha qoyulghan charlash xadimliri asasen mehelle komitétining memuriy xadimliri shundaqla teshkillen'gen adettiki xizmettiki puqralar bolup, ulargha bixeterlik qoghdash xadimi namida kishilerni axturush, tekshürüsh, qolgha élish hoquqliri bérilgen.
Xitay da'irilirining nöwette olimpik üchün körsitiwatqan bihude sezgür ipadisi hemde bu xil alahide bixeterlik tedbirliri, kishilik hoquq teshkilatlirining qattiq tenqidige uchrimaqta.
Xitay da'iriliri béyjing olimpikining bixeterlikini qoghdash üchün bir milyondin köprek xadimni ishqa séliwatqan bolup, buning ichide peqet herbiy hem saqchi küchi 100mingdin ashidu.