Qeshqerde 100 din artuq Uyghur qolgha élin'ghan

 Bu uchurni merkizi gérmaniyidiki dunya Uyghur qurultiyining bayanatchisi dilshat rishit peyshenbe küni gérmaniye axbarat agéntliqigha bergen bayanatida tekitligen bolup, u qolgha élin'ghanlar qeshqer etrapidiki nahiye we yézilardin kelgen kishilerni öz ichige alidighanliqini ilgiri sürgen.

Dilshat rishit yene, qolgha élin'ghanlarning bezilirining tayaq yigenlikini, put we bash qismidin yarilan'ghanliqini bildürgen. Lékin qeshqerdiki yerlik hökümet da'iriliri bolsa dunya Uyghur qurultiyining bayanlirini ret qilmaqta. Gérmaniye agéntliqining xewiride eskertishiche, mezkur agéntliqning muxbiri qeshqerdiki yerlik da'iriler bilen alaqe qilghan bolup, bir yerlik emeldar " qolgha élin'ghanlarning bunchilik köp emesliki"ni tekitligen, lékin zadi qanchilik kishining qolgha élin'ghanliqini ashkarilimighan.

Yéqinda qeshqer yéngi sheher nahiyilik hökümetning tor béti xaklan'ghan bolup, xakirlar sherqiy türkistanning ay yultuzluq kök bayriqini hökümetning tor bétige chaplap qoyghan idi. Da'iriler bir qanche sa'ettin kéyin mezkur tor betni taqighan.

Dilshat rishit yene, qolgha élin'ghanlarning köpiyiwatqanliqini, xelq'ara jem'iyettin Uyghurlarning hoquqini qoghdash, béyjing hökümitige konkrét we tesir qilidighan yollar bilen bésim ishlitishni telep qilghan. Dunya Uyghur qurultiyi ilgiri kuchada yüz bergen 10 ‏ - awghust weqesidin kéyin xitay da'irilirining mezkur nahiyide 90 dek kishini qolgha alghanliqini ilgiri sürgen idi.