Ürümchidiki bir ali mektepte qiz oqughuchilar üstidin hamildarliq tekshürüshi élip bardi

Uyghur aptonom rayonidiki yerlik metbu'atlarning xewer qilishiche, aptonom rayonning merkizi ürümchidiki bir ali mektepte qiz oqughuchilar üstidin mejburi türde hamildarliq tekshürüshi élip élip bérilghan.

Metbu'atlar, bu tekshürüsh, oqughuchilar we oqughuchilarning a'ile - tawabati aldidiki mes'uliyetchanliqini ada qilishni meqset qilghan, dep yazdi. Xewerde, tekshürüshning qaysi ali mektepte élip bérilghanliqini éniq otturigha qoymighan bolsimu, lékin tekshürüsh bir téxnik mektepte élip bérilghanliqini we tekshürüshning birqanche yildin béri yéngi oqughuchilar tetilge qoyup bérilishtin burun yolgha qoyuliwatqanliqini bildürdi.

Mektep da'iriliri " her yili oqughuchilarda salametlik tekshürüshi élip bériwatimiz. Bu qétimqi hamildarliqni tekshürüsh buning bir qisimi," dep tekitligen. Roytérs axbarat agéntliqining xewer qilishiche, da'iriler yéngi oqughuchilarning texminen % 80 - 70 ni teshkil qilidighan yéshi 17 din 18 giche bolghan qizlarni mektep zaligha yighip, süydük tekshürüshi élip barghan.

Xewerde eskertishiche, eger qizlarda hamildarliqtin bisharet béridighan normalsiz ehwallar bayqisa, doxtur buni derhal mektep da'irilirigha melum qilidiken. Hamildarliq alametliri bayqalghan bezi oqughuchilarning mekteptin özlikidin chékinidighan yaki bashqa mektepke yötkilip kétishni iltimas qilghan ehwallarmu körülgen.

Lékin xewerde bezi oqughuchilarning dostliridin süydük ariyet élip tekshürüshtin ötüwalghanliqinimu yazdi. Bezi oqughuchilar süydük tekshürüshtin nahayiti qolaysizliq his qilghanliqini bildürgen. Yene beziler bu usulgha qarshi élish pozitsiyisi tutqan.

Xitay da'iriliri Uyghur aptonom rayonida pilanliq tughut siyasitini yolgha qoyghan 1987 -yildin béri, bolupmu yéqinqi 10 yildin béri bu siyasetni qattiq ijra qilmaqta. Küzetküchilerning eskertishiche, qiz oqughuchilar üstidin hamildarliq tekshürüshi élip bérish xitaydiki bashqa ali mekteplerde körülüp baqmighan ehwal bolushi mümkin. (Erkin)