Qizilsu aptonom oblastidin 60 ming déhqan ishqa orunlashturush bahanisida yurtidin yötkeldi

Shinxu'a torining 27 - noyabir xewiridin ashkarilinishiche, bu bir yil ichide qizilsudin ikki mingdin artuq déhqan, xitay hökümitining yéza éshincha emgek küchlirini sirtlargha yötkep ishqa orunlashturush siyasiti buyiche xitayning jéjyang, jyangsu, tyenjin, xébéy qatarliq jayliridiki zawutlargha yötkelgen.

Igilinishiche, 2007 - yili bir yil ichidila mushu xil siyaset bilen qizilsuning her qaysi nahiye ‏- yéziliridin 60 mingdin artuq déhqan yerlirini tashlap sirtlargha yötkelgen. Xewerde déyilishiche, mezkür siyasetni emeliyleshtürüshke mes'ul orunlar yenimu köp déhqan ‏- charwichilarni kirimini östürüsh üchün yurtini tashlap sirtlargha bérip ish izdeshke righbetlendürüwatqan bolup, bolupmu xitay ölkilirige yötkilishni bekrek tewsiye qilmaqta iken. Qizilsu oblasti da'iriliri nöwette her bir a'ilidin birni sirtqa yötkesh siyasitini qollinip, yéza emgek küchlirini yötkep ishqa orunlashturushni jiddiy dawam qilmaqta iken.

Qizilsu, qeshqer, xoten hemde aqsudin ibaret Uyghurlar zich olturaqlashqan jaylarni,xitay da'iriliri emgek küchini xitaygha yötkesh pilanini yörgüzidighan eng asasliq "bir oblast, üch wilayet "dep élan qilghan idi.

Xitay hökümitining pilani buyiche, bu yil Uyghur élining mushu bir oblasti we üch wilayitini asas qilip yézilardin, xitay ölkilirige yötkilidighan emgek küchliri sanini, bir milyon ikki yüz minggha yetküzmekchi shundaqla asasliqi 18 yashtin 25 yashqiche bolghan Uyghur qizlirini asas qilip yötkimekte.

Xitay hökümitining nikah yéshidiki qizlarni türkümlep étnik rayonidin yötkishi kishilik hoqoq teshkilatliri teripidinmu, érqiy tazilash xaraktérini alghan heriket dep eyiblenmekte. (Gülchéhre)