Uyghur ilidin xitay ölkilirige mejburiy yötkep emgekke sélin'ghan qizlarning bir qisimi qaytip keldi


2007-12-11
Share

Xitay axbarat wasitiliri bergen xewerlerdin melum bolushiche, 10 - dékabir xitayning jéjyang ölkisi pingxu shehirige jaylashqan melum zawutqa ishlemchilikke élip kétilgen bir qisim Uyghur qizliri yurtigha qaytip kelgen. Bu nöwet qaytip kelgen qizlarning köpinchisi yéngisar nahiyisi tewesidin bu yil 3- ayda xitayning jéjyang ölkisige élip kétilgen bolup, bu qizlarning ashu ötken 9 ay jeryanida xitay ölkiside néme ishlargha sélin'ghanliqi we xizmet tertipining qandaqliqi téxi nurghun ademlerge qarangghu. Halbuki, biz burun xitay zawutliridin qéchip kelgen Uyghur qizlardin igiligen melumatlargha qarighanda, ular jismaniy xorluqqa uchrighan iken.

Xitayning Uyghur ilkidiki hökümiti we yerlik hökümet apparatliri 2006- yilining axiridin bashlapla Uyghur qizlirini xitay ölkilirige mejburiy toshup kéliwatqan bolup, xitayning bu qilmishi dunyaning herqaysi jayliridiki Uyghurlarning qattiq endishige salghan we Uyghur kishilik hoquq pa'aliyetchilirining tirishchanliqi arqisida dunya jama'etchilikining diqqitini qozghighan idi.

Amérika tashiqi ishlar ministirliqi adem etkeschilikige qarshi turush we közitish idarisining bashliqi, bash elchi mark logan, Uyghurlarning adem etkeschilik qilmishining ziyankeshlikige uchrawatqanliqini eskertip, Uyghur qizlarni mewjut shertler bilen ichkiri ölkilerde ishleshke mejburiy yötkesh herikiti rast bolsa, bu adem etkeschilik qilmishigha yatidighanliqini bildürgen idi.

Dunya Uyghur qurultiyi bayanatchisi dilshat rishitning bildürüshiche, xitayning bu bir türküm Uyghur qizlirini tuyuqsiz yötkep kélishi qandaqtur bir tasadipiy ehwal bolmastin, belki xitay mushu jehette bashqa ellerning bésimigha uchrighan bolushi mumkin iken.

Dilshat rishit yene, gerche xitayning mezkur Uyghur qizlirining bir qismini qayturup kélip barliq axbarat orunlirida teshwiq qilishidiki sewebni dunya jama'etchilikini aldash we téximu köp qizlarni xitay ölkilirige élip kitishidiki hélisi bolsimu, emma bu bir türküm qizlarning öz yurtlirigha qaytip kélishi yenila yaxshi ish iken. (Jüme)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet