Текәс наһийисидин қазақ яшлири чиңдавға ишләшкә әвәтилди


2007-06-03
Share

Уйғур елидин уйғур қизлирини хитайниң ичкири шәһәрлиридики карханиларға елип берип ишқа селиш давамлашмақта. Игилигән учурлардин қариғанда, ичкиригә берип ишләйдиғанлар қатариға мәлум санда қазақларму киргүзүлгән болуп, бу җәһәттә текәс наһийиси вәкил характерлиқ рол ойниған.

Шинҗаң хәвәр ториниң учуриға асасланғанда, 2-июн күни текәс наһийиси 38 нәпәр яшни чиңдав шәһиридики " чиңдав миңгоң електир санаити һәссидарлиқ ширкити" дәп аталған карханиға әвәткән болуп, буларниң % 90 тидин артуқрақиниң қазақлар икәнлики мәлум болған.

Игилинишичә, 38 адәмниң 30 нәпири әрләр болуп, булар токчилиқ, аилә електир сайманлири қатарлиқларни асас қилған саһәләр бойичә ишқа селинидикән . Хәвәрдә көрситилишичә, текәс наһийиси чиңдавдики мәзкур кархана билән үч йиллиқ тохтам түзгән болуп, ишчиларниң кира һәққи қатарлиқларға завут мәсул болидикән. Бу қетимқиси мәзкур наһийиниң чиңдавға әвәткән төтинчи түркүмдики ишчилар әтрити болуп , илгири пүтүнләй қизлар елип кетилгән иди.

Уйғур қизлирини "ешинча әмгәк күчлирини ишқа орунлаштуруш" шуари астида хитайниң ичкири өлкилиридики хусусийларниң ачқан карханилириға апирип ишқа селиш йеқиндин буян әвҗи алған болуп, буниңда қәшқәр, турпан вилайити асасий нуқта қилинған.

Игилигән түрлүк инкасларға қариғанда, йеши 16-дин 20 ғичә болған ,техи той қилмиған қизлар буниң обйекти қилинған болуп, бәзи җайларда мәҗбурлаш түси алған, ишләмчи қизларниң сирт билән алақә қилиши контроллуқ астиға елинған болуп, иш һәққиму йәрлик хитай ишчиларға қариғанда төвән һесаблинидикән.

Нөвәттә, чәт әлләрдики уйғур тәшкилатлири вә бәзи хәлқаралиқ әмгәк һәм инсан һоқуқи тәшкилатлири уйғур әмгәкчи қизлириниң әһвалиға көңүл бөлмәктә. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт