Uyghur qizlirini xitay ölkilirige yötkesh ishliri dawamlashmaqta

Chet'ellerdiki Uyghur kishilik hoquq teshkilatlirining küchlük naraziliqini qozghawatqan, xitayning éshincha emgek küchlirini ichkiri ölkilerge orunlashturush istiratégiyisi Uyghur élide izchil dawamlashmaqta.

Xitay axbarat wastilirining yéqinda élan qilghan xewiridin ashkarilinishiche, xoten wilayitidiki sheher ‏- nahiyiler, 9 yilliq ma'aripni tamamlighan Uyghur yashlirini tallap, ularni bir muddet terbiyiligendin kéyin, xitayning béyjing shehiri we jéjyang ölkisige bérip ishleshke teshkilligen.

Yéqinda yene , kériye nahiyisidin 103 kishi jéjyang ölkisidiki bir xitay zawutigha, guma nahiyisidin 50 kishi shendung ölkisidiki "yéxé" kiyim - kéchek tikish zawutigha, xoten nahiyisidiki 45 kishi yene jéjyang ölkisi " jingdungfang" zawutigha ishqa orunlashturulghan.

Éshincha emgek küchlirini ishqa orunlashturush, xelqning himayisige érishishke tégishlik bir ish hésablansimu, lékin xitay ölkiliridiki zawutlargha orunlashturulghan qizlar duchar boluwatqan her xil weqeler, kishilerning mezkür istratégiyige bolghan gumanini qozghimaqta. Uyghur kishilik hoquq teshkilatliri, Uyghur yash qizlirini asas qilghan emgek küchlirining xitay ölkilirige orunlashturulushi, Uyghurlarni asmiliyatsiye qilish qedimini tézlitishni meqset qilghan dep körsetmekte.

Yéqinda metbu'atlarda élan qilin'ghan , xitay ölkisidiki zawuttin qéchip kelgen 5 neper Uyghur qizning kechürmishliri, kishilik hoquq teshkilatlirining perezlirining toghra ikenlikini ispatlap bergen idi. (Eqide)