Xitay hökümiti 2008 - yilliq yéza xizmiti pilanida yashlarni xitay ölkilirige yötkeshni dawamlashturmaqchi

Uyghur éli hökümet tor betliridin ashkarilinishiche, Uyghur aptonom rayonluq 2008 - yilliq yéza xizmet yighini,4 - we 5 - yanwar ürümchide chaqirilghan bolup, yighinda, xitay hökümitining Uyghur éli yézilirida bu bir yil yürgüzidighan muhim siyaset hem xizmetliri élan qilin'ghan.

Yighin heqqidiki xewerlerdin melum bolushiche, yéza éshincha emgek küchlirini sirtlargha yötkep ishqa orunlashturush siyasiti 2008 - yildiki eng muhim xizmet pilani ichige kirgüzülgen bolup, xitay hökümiti bu yil yene,sirtlargha yötkep ishqa orunlashturulidighan yéza emgek küchlirini bir milyon 500 ming adem ‏- qétimgha yetküzgendin bashqa, turaqliq halda 300 ming éshincha emgek küchlirini sirtlargha yötkep ishqa orunlashturushqa kapaletlik qilish pilanini ishqa ashurmaqchi iken.

Melum bolushiche, xitay hökümiti 2007 - yilida Uyghur élidin sirtlargha yötkep ishqa orunlashturghan yéza éshincha emgek küchlirini bir milyon ikki yüz ming adem ‏- qétimgha yetküzgen. Xitay hökümiti teripidin Uyghur déhqanlirini namratliqtin qutuldurushtiki muhim tedbir dep teripliniwatqan Uyghur yéza emgek küchlirini xitay ölkiliri hemde bashqa yurtlargha yötkep ishqa orunlashturush siyasitini emeliyleshtürüsh jeryanida asasen 18 yashtin 25 yashqiche bolghan Uyghur yéza qizlirini asas qilip,xitay ölkilirige mejburiy yötkigen bolup,ularning heq ‏- hoquqliri éghir dexlige uchrighan, bu Uyghurlarda küchlük naraziliq qozghighan bolup, kuchada hetta mushu sewebtin xelq hökümetke qarshi naraziliq namayishi élip barghan idi.

Amérika awam palata ezaliri yéqinda xitay hökümitining Uyghur élide yürgüzüwatqan mezkur siyasitini, Uyghurlargha qarita irqiy qirghinchiliq tüsini alghan bir siyaset dep eyibligen idi. Xitay hökümiti ötken yili asasen qeshqer, xoten, qizilsu hemde aqsudin ibaret Uyghurlar eng zich olturaqlashqan jaylarni asas qilip Uyghur qizlirini ishqa orunlashturush bahaniside xitay ölkilirige yötkigen bolup,qeshqer hökümet torining 8 - yanwardiki xewiridin ashkarilinishiche, qeshqer wilayitidin ötken bir yilda sirtlargha yötkelgenler 606 ming adem ‏- qétimgha yetküzülgen. (Gülchéhre)