Дуня уйғур қурултийи кучада қизлирини қоғдиған ата - аниларниң бесиқтурулғанлиқини әйиблиди


2007.07.20

Дуня уйғур қурултийи, уйғур илиниң куча наһийисидә қизлирини ичкири өлкигә йөткәшкә қарши чиққан ата - аниларниң бастурулғанлиқини әйиблиди. Дуня уйғур қурултийи баянатчиси дилшат ришит җүмә күни баянат елан қилип," бу вәқә хитай даирилириниң уйғур қизларни ичкиригә йөткәштә немә мәқсәдкә йәтмәкчи болуватқанлиқини ашкарилиди " дәйду.

Дилшат ришитниң әскәртишичә, уйғур қизлирини мәҗбурий вастилар билән ичкиригә йөткәш сиясити уларға хизмәт тепиш мәсилиси әмәс. Бәлки сияси арқа көрүнүшкә игә яман ғәрәзлик пиландур " у йәнә , "әгәр бу пилан хизмәт тепип беришни мәқсәт қилса, улар немә үчүн шу җайниң өзидә хизмәткә орунлаштурулмайду ? " дәп сориди.

Радиомизниң игилишичә , йеқинқи икки һәптә ичидә куча наһийисидики диһқанлар наһийилик һөкүмәтниң әрзийәт ишханисиға келип, қизлирини ичкиригә йөткәшкә қарши чиққан. Куча наһийисиниң һакими һүсәнҗан мәмтимин вәқәниң әрзийәт вәқәси икәнликини билдүрди. Лекин бәзиләр диһқанларниң намайиш қилғанлиқини билдүрмәктә.

Кучадики хәвәрдар әрбапларниң әскәртишичә, вәқә йүз бәргәндин кейин, ақсу вилайәтлик дөләт вә җамаәт хәвпсизлик органлири кучаға ярдәмчи сақчиларни әвәтип, куча наһийисидики һәр қайси органлардин вәқәниң ашкарилинип кетишидин қәтий сақлинишни тәләп қилған. Даириләр вәқәдә кишиләрниң қолға елинғанлиқини рәт қилмақта. Дилшат ришит, хитай даирилирини уйғурларниң таллаш әркинликигә һөрмәт қилишқа чақирди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.