Xitay da'iriliri Uyghur élide qoral-yaraq bashqurushini chingitti

Uyghur aptonom rayoni qurulghanliqining 50 yilliqi harpisida, aptonom rayonluq jama'et xewpsizlik idarisi axbarat élan qilish yighini chaqirip, hazirdin bashlap her qaysi derijilik jama'et xewpsizlik organlirining, her xil jinayi ishlargha qattiq zerbe bérish halitini dawamliq saqlash bilen birge, qoral-yaraq, oq-dora we partlatquch boyumlargha bolghan kontrolluqni téximu chingitishi lazimliqini jakarlidi.

Rayonluq jama'et xewpsizlik idarisining mu'awin bashliqi lyu kéchinning bildürüshiche, her qaysi derijilik j x xadimliri pütün aptonom rayon boyiche tapancha, partlatquch we ximiyiwiy boyumlarni keng kölemlik axturush herikitini élip béripla qalmastin, shundaqla hökümet xadimlirigha bérilgen tapanchilar üstidinmu omumiyüzlük tekshürüsh élip baridiken hemde tizimgha élinmighan we hökümetning qoral bérish shertlirige toshmighan barliq tapanchilarni musadire qilidiken.

Uqturush boyiche yene, 8 -ayning 20 - künidin bashlap, her qaysi idarilerdiki qoral bérilgen xadimlarning ürümchi, qeshqer we ghulja sheherlirige qoralliq kirishimu cheklinidiken. Shundaqla her qaysi derijilik j x idarilirimu hazirdin bashlap aptonom rayonning 50 yilliqi mezgiligiche, tapancha, oq-dora, partlatquch boyumlar we zeherlik gaz qatarliq xeterlik boyumlarni béjirish resmiyetlirini waqitliq toxtitidiken.

Xitay da'iriliri Uyghur aptonom rayonining qurulghanliqining 50 yilliqi mabeynide, bu yerde her xil qarshiliq heriketlirining yüz bérishidin endishe qilip bu belgilimini chiqarghan bolup, ular yene, aptonom rayon boyiche " qattiq zerbe bérish herikiti" ni jiddiy élip barmaqta.

Dunya Uyghur qurultiyining bayanatchisi dilshat rishit, Uyghurlarning ezeldin aptonom rayonni étirap qilip baqmighanliqini, shu sewebtin xitay hökümiti Uyghurlarning siyasiy erkinlikini boghup quruwalghan bu aptonom rayonning 50 yilliqida, Uyghurlarning narazi bolushidin endishe qilip, jem'iyet amanliqini saqlashqa alahide küch chiqiriwatqanliqini bildürdi. (Peride)