Генерал заһир савданофқа матәм мурасими өткүзүлди


2007.08.19

15- Авғуст күни узун мәзгиллик еғир кесәлдин кейин, 87 йешида вапат болған сабиқ шәрқий түркистан җумһурийити миллий армийисиниң майор дәриҗилик офитсери, 1949-йилидин кейин өмүр бойи хитай армийиси үчүн хизмәт қилип , генераллиқ унваниға сазавәр болған заһир савданофқа тәзийә билдүрүш мурасими 17-авғуст күни үрүмчидә өткүзүлгән.

Уйғур аптоном районлуқ коммунистик партийә комитетиниң мәхсус учур тори һесаблинидиған" тәңри тағ " ториниң хәвиригә асасланғанда, хитай мәркизий һәрбий ишлар комитетиниң муавин рәиси гу бошуң, ләнҗу һәрбий район қомандани ваң го шең , уйғур аптоном райони партком секритари ваңлечүән шуниңдәк хитай мәркизий һөкүмитидә әмәл тутуватқан уйғурлардин исмаил әмәт, абләт абдурешит вә төмүр давамәт һәм башқа нәччә онлиған хитай вә аптоном районниң рәһбирий шәхслири матәм мурасимға иштирак қилған һәм гүл чәмбирәк тәқдим қилған.

Хәвәргә асасланғанда, заһир савданофқа " садиқ коммунизм җәңчиси, җуңго компартийисиниң илғар әзаси, хитай армийисиниң илғар сиясий хизмәтчиси" дәп баһа берилгән. Лекин, чәт әлләрдә яшаватқан бир қисим сабиқ шәрқий түркистан җумһурийити миллий армийисиниң офитсерлириниң баһаси башқичә болуп, уларниң қаришичә, савданоф гәрчә миллий армийиниң офитсери болсиму, лекин 1949-йилдин кейин хитай һөкүмити үчүн актип хизмәт қилғанлиқи, миллий мустәқиллиқ, әркинлик идийилиригә қарши хитай һөкүмити билән бир сәптә туруп күрәш қилғанлиқи үчүн үзлүксиз дәриҗиси өсүп, етибар бериш һәм әтиварлап ишлитилишкә еришкән. Әмма, башқа йүзлигән, өз йолидин ваз кәчмигән офитсерлар һәм җәңчиләр, мәсилән, полковник абдуғопур сабир һаҗи, илдирим, рахманоф қатарлиқлар болса етип ташланған һәм җазаларға йолуққан.

Савданофқа 1955-йили мавзедуң тәрипидин генерал майорлуқ унвани берилгән болуп, шу қатарда миллий армийә полковниклиридин зунун тейипоф , муһәммәд имин иминоф, мәрғуп исһақоп қатарлиқларғиму генерал майорлуқ унвани берилгән болсиму, лекин бу үч киши көп тәнқид вә җазаларға дуч кәлгән икән. Зунун тейипоф билән мәрғуп исһақоф қазақистанға кетип, уйғур мустәқиллиқ һәрикәтлири билән шуғуллинип вапат болған болса, иминоф 70-йилларда шәрқий түркистан хәлқ инқилаби партийиси билән бағлинип җазаланған һәмдә сирлиқ түрдә һаятидин айрилған икән.

Савданоф миллий армийиниң уруш мусапилирини әкис әттүридиған " манас дәрясидин қайтиш", " бәшинчи корпусниң мусапилири" қатарлиқ әслимә характерлиқ әсәрләрни йезип нәшир қилдурған болуп, уйғур җәмийитидә савданоф һәм униң әсәрлири һәққидә һәр хил инкаслар давамлашмақта.(Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.