Général zahir sawdanofqa matem murasimi ötküzüldi

15- Awghust küni uzun mezgillik éghir késeldin kéyin, 87 yéshida wapat bolghan sabiq sherqiy türkistan jumhuriyiti milliy armiyisining mayor derijilik ofitséri, 1949-yilidin kéyin ömür boyi xitay armiyisi üchün xizmet qilip , généralliq unwanigha sazawer bolghan zahir sawdanofqa teziye bildürüsh murasimi 17-awghust küni ürümchide ötküzülgen.

Uyghur aptonom rayonluq kommunistik partiye komitétining mexsus uchur tori hésablinidighan" tengri tagh " torining xewirige asaslan'ghanda, xitay merkiziy herbiy ishlar komitétining mu'awin re'isi gu boshung, lenju herbiy rayon qomandani wang go shéng , Uyghur aptonom rayoni partkom sékritari wangléchü'en shuningdek xitay merkiziy hökümitide emel tutuwatqan Uyghurlardin isma'il emet, ablet abduréshit we tömür dawamet hem bashqa nechche onlighan xitay we aptonom rayonning rehbiriy shexsliri matem murasimgha ishtirak qilghan hem gül chembirek teqdim qilghan.

Xewerge asaslan'ghanda, zahir sawdanofqa " sadiq kommunizm jengchisi, junggo kompartiyisining ilghar ezasi, xitay armiyisining ilghar siyasiy xizmetchisi" dep baha bérilgen. Lékin, chet ellerde yashawatqan bir qisim sabiq sherqiy türkistan jumhuriyiti milliy armiyisining ofitsérlirining bahasi bashqiche bolup, ularning qarishiche, sawdanof gerche milliy armiyining ofitséri bolsimu, lékin 1949-yildin kéyin xitay hökümiti üchün aktip xizmet qilghanliqi, milliy musteqilliq, erkinlik idiyilirige qarshi xitay hökümiti bilen bir septe turup küresh qilghanliqi üchün üzlüksiz derijisi ösüp, étibar bérish hem etiwarlap ishlitilishke érishken. Emma, bashqa yüzligen, öz yolidin waz kechmigen ofitsérlar hem jengchiler, mesilen, polkownik abdughopur sabir haji, ildirim, raxmanof qatarliqlar bolsa étip tashlan'ghan hem jazalargha yoluqqan.

Sawdanofqa 1955-yili mawzédung teripidin général mayorluq unwani bérilgen bolup, shu qatarda milliy armiye polkownikliridin zunun téyipof , muhemmed imin iminof, merghup is'haqop qatarliqlarghimu général mayorluq unwani bérilgen bolsimu, lékin bu üch kishi köp tenqid we jazalargha duch kelgen iken. Zunun téyipof bilen merghup is'haqof qazaqistan'gha kétip, Uyghur musteqilliq heriketliri bilen shughullinip wapat bolghan bolsa, iminof 70-yillarda sherqiy türkistan xelq inqilabi partiyisi bilen baghlinip jazalan'ghan hemde sirliq türde hayatidin ayrilghan iken.

Sawdanof milliy armiyining urush musapilirini ekis ettüridighan " manas deryasidin qaytish", " beshinchi korpusning musapiliri" qatarliq eslime xaraktérliq eserlerni yézip neshir qildurghan bolup, Uyghur jemiyitide sawdanof hem uning eserliri heqqide her xil inkaslar dawamlashmaqta.(Ümidwar)