Qorghastiki sen'gung saqchixana weqesidin kéyin nahiye teweside dindar yashlar yighiwélinip soraq qilin'ghan

 Rayondiki ismini ashkarilashni xalimaydighan weqedin xewerdar bir kishining radi'omizgha eskertishiche, yighiwélish obékti keyp ‏ - sapa bilen shughullanmaydighan, haraq, tamakidin xali kishilernimu öz ichige alidiken. Weqedin xewerdar yuqiriqi kishi chingsixozidiki birleshme shtabqa yighiwélin'ghan yashlarning az dégende birer yüzge yétidighanliqini, lékin bezilerning qoyup bériliwatqanliqini ilgiri sürmekte. Lékin bu san saqchi da'iriliri teripidin ispatlanmidi. Yuqiriqi kishining eskertishiche, saqchilar yighiwélin'ghan yashlarning "munasiwet da'irisi, yéqinda alaqe qilghan kishiliri " ni sürüshmekte iken.

 5‏ - Ayning 23‏ - küni sen'gung saqchixanisigha 2 dane bénzén qachilan'ghan botulka étilghan bolup, weqede saqchixanining bir bolkiway aptomobili köyüp ketken idi. Weqedin kéyin ili oblastliq j x idarisining mu'awin bashliqi yétekchilikide mexsus bir délo guruppisi qurulghan. Bu weqe béyjing olimpik mesh'ili Uyghur élige yétip kélishtin burun yüz bergechke weqe da'irilerning alahide diqqitini qozghidi.

Weqedin xewerdar kishining eskertishiche, perzenti yighiwélin'ghan lékin hazirghiche perzentining iz ‏ - dérikini alalmighan ata - anilar chingsixozidiki birleshme shtabning aldigha yighiliwalghan. Biz yerlik da'iriler bilen alaqilishishqa tirishqan bolsaqmu, lékin sen'gung saqchixanisidiki téléfonimizni almidi. Mezkur saqchixanining mes'uli ilgiri radi'omizgha weqeni " adettiki amanliq délosi " dégen idi. Lékin merkizi gérmaniyidiki dunya Uyghur qurultiyi xitayning olimpik mesh'ilini bahane qilip, közige patqan Uyghurlarni basturuwatqanliqini, shu tüpeyli olimpik mesh'ilini Uyghur élide yetküzüshni bikar qilishni telep qilmaqta.