"Шинҗаң вәкилләр өмики" ниң қурултайға бәргән тәклипи, уйғурларға хитай тил маарипини күчәйтиш болди

Хитай хәлқ қурултийиниң бейҗиңда чақирилған мәмликәтлик йиғиниға уйғур аптоном райони намидин қатнишиватқан бәзи вәкилләрниң қурултайда оттуриға қойған тәклипи, уйғурларға хитай тилида дәрс өтүшни күчәйтишни тәләп қилиш болди. юқириқи тәклип қурултай вәкили өмәр абдулла билән рози гүлбай тәрипидин хәлқ қурултийиниң гуруппа музакирисидә оттуриға қоюлған.

Хитай мәтбуатлириниң хәвәр қилишичә, өмәр абдулла билән рози гүлбай, " әмәлийәт уйғур аптоном районида қанат яйдуриливатқан миллий мәктәпләр билән хәнзу мәктәпләрни бирләштүрүш пиланиниң шундақла хитай тилида дәрс өтүшниң интайин тоғрилиқини испатлиди", дәп көрсәткән.

Уйғур аптоном районида хәнзу тили оқутқучилириниң йетишмәйдиғанлиқини тәкитлигән өмәр абдулла билән рози гүлбай, "бу мәзкур хизмәткә тәсир йәткүзмәктә шундақла биз дөләтниң хәнзу тили оқутқучилирини тәрбийиләш, хәнзу мәктәпләр билән миллий мәктәпләрни бирләштүрүш қатарлиқ мәсилиләрдә техиму көп ярдәм беришини тәләп қилимиз", дәп әскәрткән.

Миллий мәктәпләргә хитай тилида дәрс өтүш чариси, уйғур аптоном районида талаш тартиштики мәсилә болуп келиватиду. Мәзкур чарини тәнқид қилғучилар, бейҗиң даирилирини хәлқара әһдинамилар, хитай асаси қануни шундақла миллий аптономийилик қанунлардики бәлгилимиләргә хилаплиқ қилиш билән тәнқидлимәктә. Ш у а р ниң партком секритари ваң лечүән, хитай тилини омумлаштуруш сәвәбини " уйғур тили заманниң тәрәққиятиға йетишәлмәйватиду," дәп чүшәндүргән иди. (Әркин)