"Shinjang wekiller ömiki" ning qurultaygha bergen teklipi, Uyghurlargha xitay til ma'aripini kücheytish boldi

Xitay xelq qurultiyining béyjingda chaqirilghan memliketlik yighinigha Uyghur aptonom rayoni namidin qatnishiwatqan bezi wekillerning qurultayda otturigha qoyghan teklipi, Uyghurlargha xitay tilida ders ötüshni kücheytishni telep qilish boldi. Yuqiriqi teklip qurultay wekili ömer abdulla bilen rozi gülbay teripidin xelq qurultiyining guruppa muzakiriside otturigha qoyulghan.

Xitay metbu'atlirining xewer qilishiche, ömer abdulla bilen rozi gülbay, " emeliyet Uyghur aptonom rayonida qanat yayduriliwatqan milliy mektepler bilen xenzu mekteplerni birleshtürüsh pilanining shundaqla xitay tilida ders ötüshning intayin toghriliqini ispatlidi", dep körsetken.

Uyghur aptonom rayonida xenzu tili oqutquchilirining yétishmeydighanliqini tekitligen ömer abdulla bilen rozi gülbay, "bu mezkur xizmetke tesir yetküzmekte shundaqla biz döletning xenzu tili oqutquchilirini terbiyilesh, xenzu mektepler bilen milliy mekteplerni birleshtürüsh qatarliq mesililerde téximu köp yardem bérishini telep qilimiz", dep eskertken.

Milliy mekteplerge xitay tilida ders ötüsh charisi, Uyghur aptonom rayonida talash tartishtiki mesile bolup kéliwatidu. Mezkur charini tenqid qilghuchilar, béyjing da'irilirini xelq'ara ehdinamilar, xitay asasi qanuni shundaqla milliy aptonomiyilik qanunlardiki belgilimilerge xilapliq qilish bilen tenqidlimekte. Sh u a r ning partkom sékritari wang léchü'en, xitay tilini omumlashturush sewebini " Uyghur tili zamanning tereqqiyatigha yétishelmeywatidu," dep chüshendürgen idi. (Erkin)