Үрүмчидики бир қисим уйғур башланғуч мәктәплири қош тиллиқ мәктәпкә өзгәртилди

Үрүмчи шәһәрлик маарип идарисиниң билдүрүшичә, уйғур елидики миллийчә мәктәпләрни қош тиллиқ мәктәпкә өзгәртиш маарип сиясити бойичә, йеқинда үрүмчи шәһириниң тәңритағ районидики 5 уйғур башланғуч мәктипи қош тиллиқ мәктәпкә өзгәртилгән.

Бу мәктәпләр асаслиқи тәңритағ районидики 5 - башланғуч вә 19 - башланғуч қатарлиқ нуқтилиқ уйғурчә мәктәпләр болуп, буниңдин кейин, бу мәктәпләрдә уйғур тилидин башқа дәрсликләрниң һәммиси хитайчә өтилидикән.

Буниңдин сирт хитай даирилири йеқинқи бир нәччә йиллардин буян уйғур елиниң һәр қайси җайлиридики оттура-башланғуч мәктәпләрдә, уйғур мәктәплири билән хитай мәктәплирини бирләштүрүш ишлирини паал қанат яйдурған иди.

Илгири бизниң зияритимизни қобул қилған бирләштүрүветилгән бир мәктәпниң оқутқучиси, нөвәттә бу мәктәптики уйғур оқутқучиларниң интайин чоң бесимда ишләватқанлиқини, болупму хитайчиси анчә яхши болмиған яшанған оқутқучиларниң қийин әһвалда қеливатқанлиқини мәлум қилған.

Шундақла хитайчә дәрисләрни бәзи оқуғучилар елип кетәлисиму, әмма йәнә бәзилири хитайчини яхши чүшәнмигәнликтин дәрисләрни техиму қобул қилалмай, қаймуқуп кетиватқан әһвалларму бар икән.

Германийидики шәрқий түркистан учур мәркизиниң билдүрүшичә, үрүмчидики хитай-миллий мәктәпләр бирләштүрүлгән мәктәпләрдә 2006 - йилиғичә, уйғур оқуғучиларға тәбиий пән дәрисликлирини пүтүнләй хитайчә өтүш бир туташ йолға қоюлуп болидикән. (Пәридә)