Ваң лечүән уйғур маарипини хитайчилаштурушни 100 йиллиқ зор пилан, деди


2006-02-14
Share

Уйғур аптоном райони парткоминиң секритари ваң лечүән, уйғурларда әндишиә қозғиған аз санлиқ милләтләргә хитай тилида дәрс өтүшни омумлаштуруш пилани, һәр қандақ бәдәл төләшкә қаримай әмәлийләштүрүшкә тегишлик 100 йиллиқ зор пилан, дәп көрсәтти.

Игилишимизчә ,хитай мәркизи һөкүмити уйғур аптоном районида маарип тилини хитайлаштуруш сияситини 1995 - йили түзүп болған. Әмма мувапиқ бир пәйтниң йетип келишини күтүп бу сиясәтни әйни чағда дәрһал йолға қоймиған икән. Хитай һөкүмити 11 - синтәбир вәқәсидин кейин алди билән алий мәктәпләрдә уйғурчә дәрс өтүшни бикар қилди.

Ваң лечүән, 2002 - йили 3 - айда уйғур тилиниң заманға маслишалмиғанлиқини оттуриға қоюп, хитай тилиниң уйғур мәктәплиридә 3 - йиллиқлардин башлинидиғанлиқини җакарлиған. Хитай даирилири бу сиясәтни " қош тиллиқ маарип" дәп атимақта. Шинҗаң иқтисад гезити" ниң хәвәр қилишичә, ваң лечүән йеқинда қош тиллиқ маарип сияситини йолға қоюш мәсилисидә сақлиниватқан бәзи әһвалларни бир тәрәп қилиш бойичә бәргән йолйоруқида, " нишанни йәсли маарипиға қаритиш, йәсли оқутқучилирини көпәйтиш вә һәр қандақ бәдәл төләшкә қаримай, милләтниң түп мәнпәәтигә мунасивәтлик 100 йиллиқ зор пиланни һәл қилиш, керәк " дәйду.

Ваң лечүән, йолйоруқида бу пилан қайси милләтниң түп мәнпәәтигә мунасивәтлик 100 йиллиқ зор пилан икәнликини тилға алмиған. Буниң алдида уйғур аптоном райони парткоминиң секритари нур бәкри, хитайчә өгитишниң уйғур йәсли балилиридин башлинидиғанлиқини билдүргән иди.

Әмма һөкүмәтниң бу сияситини тәнқид қилғучи мутәхәссисләр, хитай тилини йәсли вә башланғуч мәктәп баллириға мәҗбури теңиш, балиларниң тәпәккүр усули вә писхологийисидә бошлуқ яритиду, дәп агаһландурмақта. Әмма хитай даирилири бу сиясәт уйғурларниң турмуш, илим ‏- пән вә мәдәнийәт сапасини юқири көтириду, дәп ақлиған. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт