Xitay siyasiy meslihet kéngishining yighinida Uyghurlar xitay tili ma'aripini kücheytish toghrisida teklip sunmaqchi


2006.03.03
Share on WhatsApp
Share on WhatsApp

Xitay siyasiy meslihet kéngishining jüme küni béyjingda bashlan'ghan memliketlik yighini teywen musteqilliqigha qarshi agahlandurush berdi we xitayda "inaq jem'iyet" berpa qilishqa chaqirdi. Shuning bilen birge xelq qurultiyining yighinigha qatnishidighan bezi Uyghur wekiller xitay tili ma'aripini kücheytish toghrisida teklip layihisi sunmaqchi bolghan.

Xitay siyasiy meslihet kéngishining 2200 kishilik memliketlik wekiller yighini11 kün dawamlishidu. Siyasiy meslihet kéngishi xitay parlaméntining töwen palatasi hésablansimu, emma hökümetning siyasiy pilanlirini ret qilish hoquqigha ige emes.

Parlaméntning yuqiri palatasi bolghan xelq qurultiyining memliketlik yighini yekshenbe küni bashlinidu. Siyasiy meslihet kéngishining échilish murasimida re'is jya chinglin, "biz ' teywen musteqilliqigha ' söküt qilmaymiz" dep eskertip, teywen prézidénti chén shüybyenni agahlandurdi.

Yighinda siyasiy meslihet kéngishini awam puqralarning ijtima'iy parawanliqi we turmush ehwaligha téximu chongqur köngül bölüshke chaqirghan jya chinglin, wekillerni dölet rehberlirining 'inaq jem'iyet' berpa qilish chaqiriqigha awaz qoshushqa ündidi. U, " biz ..... Keng ammigha chöküshimiz, xelqni ittipaqlashturup, ularning ümid, teleplirige jawab bérishimiz, qiyinchiliqini hel qilishimiz kérek " deydu.

Roytérs axbarat agéntliqining xewer qilishiche, bezi wekiller bechchiwazlarni kemsitishke qarshi turush we ularning toy qilishini qoghdash toghrisida teklip bermekchi, beziler ammiwiy sorunlarda tamaka chékishni cheklesh toghrisida teklip layihisi sunmaqchi iken.

"Shinjang géziti", peyshenbe künki xewiride Uyghur qurultay wekili abdulla abbasning yighinda Uyghurlargha xitay tili ma'aripini kücheytish toghrisida teklip layihisi sunidighanliqini xewer qildi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.