Wang léchüen Uyghur ösmürlirige xitay tili ögitish xizmitini izchil türde kücheytishni tekitlidi

Xitay hökümitining Uyghur aptonum rayonighan békitken rehbiri wang léchüen yéqinda, Uyghur balilirigha xitay tili ügitish xizmitini qilche boshashmastin izchil dawamlashturush kéreklikini otturigha qoydi.

Tengritagh xewer torining 18 ‏- may küni bergen xewiridin ashkarilinishiche, wang léchüen , Uyghur aptonum rayonidiki xitayche oqutush toluqsiz siniplirini közdin kechürüsh dawamida, xitayche toluqsiz ottura mekteplerning oqutush sewyisini alahide yuqiri kötürüshni bu arqiliq az sanliq milletler ma'aripi üchün töhpe qoshushni tekitligen.

Xewerdin melum bolushiche, ürümchidiki 66 ‏- ottura mektep, 15 ‏- ottura mektep, sanji 2 ‏- oـtura mektepliri noqul xitay tilida oqutush élip baridighan mektepler bolup, biraq bu mekteplerde köpligen Uyghur oqughuchilar xitay ma'aripi bilen terbiyelenmekte.

Dunya Uyghur qurultiyining bayanatchisi dilshat rishitning éytishiche, xitay hökümiti Uyghur oqughuchilarni türküm - türkümlep xitayning ichkiri ölkilirige apirip, xitay tilida oqutush élip barghandin sirt, Uyghur aptonum rayoni ichidimu bu xil oqutush tüzümini kücheytish tedbirini élip barmaqta iken. Uning éytishiche , xitay hökümi'itning meqsidi, mushu xil usul bilen Uyghur ma'aripini pütünley emeldin qaldurush pilanini ishqa ashurushtin ibaret iken.

Dilshat rishit sözide yene": chet'ellerde pa'aliyet élip bériwatqan Uyghur teshkilatliri, xitay hökümitining bu meqsidini ishqa ashurushigha hergiz qarap turmaydu, xelq'ara qanunmu, xitayning milli ma'aripi tereqqi qilghan bir milletni tilini cheklesh arqiliq yoqutush siyasitige hergiz yol qoymaydu. Biz choqum buning aldini élish üchün toxtimastin pa'aliyet élip bérimiz " dédi. (Eqide)