Уйғур аптоном районида қош тил үгиниш тәшвиқати изчил давамлашмақта


2007.01.18

Хитайниң уйғур елиға тәйинлигән әмәлдари исмаил тиливалди пәйшәнбә күни, бу йил уйғур аптоном районида қош тил өгиниш хизмитини йәниму илгири сүрүп, аз санлиқ милләт оқутқучилирини қош тилда тәрбийиләшни йолға қоюш шуниңдәк хитай өлкилиридики шинҗаң толуқ оттура синипини йәниму кеңәйтип, район ичи толуқсиз оттура синиплириниң көлимини муқимлаштурушни оттуриға қойди.

Хитай мәтбуатлирида ашкарилинишичә, йеиқинқи йиллардин буян һәр милләт аммисиниң қош тил өгиниш қизғинлиқи алаһидә юқири болуп, қош тиллиқ нәтиҗиси көрүнәрлик болған хотән вә қәшқәрдин аптоном районлуқ икки йиғинға қатнишишқа кәлгән вәкил вә әзалар қош тил өгинишниң интайин пайдилиқ икәнликини, өзлириниң хитай тилини пишшиқ билгәнлики үчүн турмушиниң баяшат өтүватқанлиқини тәшвиқ қилған.

Әмма вәтинидин айрилип чәтәлләрдә яшаватқан уйғурларниң қаришичә, хитай тили билгәнлики үчүн, турмуши яхши өткән уйғурлар интайин аз санни игиләйдикән. Хитай һөкүмитиниң қош тил өгиниш сиясити, қаримаққа интайин илмий туюлсиму, маһийәттә бир милләтниң тилини йоқитиш күришидин ибарәт болуп, хитай һөкүмитиниң " қош тил өгиниш" шуари әмәлийәттә қош тил өгиниш әмәс бәлки бир тил өгинишни асас қилидикән.

Игилишимизчә, уйғур аптоном районида хитайлар һечқачан уйғур тилини өгинишкә әһмийәт бәргән әмәс, хитайларни хизмәткә қобул қилишта уйғур тили билиш шәрт қилинмайду, бәлки бир уйғурни хизмәткә қобул қилишта униң хитайчини мүкәммәл билиши бирдин - бир муһим шәрт һесаблиниду. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.