Xitay hökümiti Uyghur ewladlirini xitay ma'aripida terbiyilesh kölimini yene bir qedem kéngeytti

Xitay da'iriliri bu yil xitay ölkiliridiki shinjang toluq ottura sinipigha qobul qilidighan oqughuchilar sanini köpeytish bilen birge, Uyghur aptonom rayonining özide xitay tili toluq ottura sinipi tesis qilidiken.

Xitay axbarat wasti'ilirining 15 ‏- féwral künidiki xewerliridin ashkarilinishiche, bu yil xitay ölkisige qobul qilinidighan oqughuchilar sani eslidiki 3990 kishidin 5000 kishige yetküzilidiken.

Buningdin sirt aptunum rayonluq maliye nazaritining biwaste mes'ulliqida, Uyghur élining özide échilghan " shinjang toluqsiz ottura sinipi" ni püttürgen oqughuchilarning toluq otturida oqush qéyinchiliqini hel qilish üchün, " shinjang toluq ottura sinipi" din 8 i échilidiken.

Aptonum rayonluq ma'arip nazaritining bildürüshiche, döletning shinjang ma'aripigha körsetken yardimining küchiyishige egiship, xitay ölkiliridiki " shinjang toluq ottura sinipi" yildin ‏- yilgha kéngiyishke bashlap, mektep sanini 45 ke yetküzgen. Nöwette oqughuchilar sani 10 mingdin ashqan.

Xitay hökümiti gerche mezkür ma'arip siyasitini, xitay bolmighan az sanliq millet ma'aripining süpitini yuqiri kötürüsh üchün dep qarighan bolsimu, biraq chet'ellerde Uyghurlarning kishilik hoquq we démokratiyisi üchün pa'aliyet élip bériwatqan teshkilatlar, buni ma'arip süpitini yuqiri kötürüsh emes, belki Uyghurlarning ma'aripini yoq qilip, Uyghur ewladlirini " özi Uyghur, tili xitay " qilip yétishtürüshtek asmiliyatsiye qilish siyasiti déyishmekte. (Eqide)