Хитай һөкүмити уйғур елидә қош тиллиқ оқутқучи тәрбийиләш үчүн техиму көпләп мәбләғ салмақта


2007.03.06

Хитай һөкүмити бу йил 3 - айниң 1 ‏- күнидин башлап, үрүмчидики шинҗаң маарип институтида, аз санлиқ милләт қош тиллиқ оқутқучилирини икки йиллиқ муддәт билән тәрбийиләш хизмитини рәсмий йолға қоймақчи болуватқанлиқини , шундақла аптоном мәзкур пилани буйичә, 2007 ‏- йилидин 2014 ‏- йилиғичә болған бу йәттә йил ичидә, 13500 оқутқучини қош тиллиқ қилип тәрбийиләп чиқмақчи болуватқанлиқини җакарлаш билән бир вақитта, уйғур елидә қош тиллиқ оқутқучи тәрбийиләш үчүн 200 милйон мәбләғ салмақчи болуватқанлиқини мәлум қилди.

Сәйшәнбә күни тәңритағ тор бетидә берилгән хәвәрдин мәлум болушичә, хитай һөкүмити бу йилдин башлап 5 йил ичидә, 10 миң аз санлиқ милләт башланғуч - оттура мәктәп қош тиллиқ оқутқучисини тәрбийиләп чиқидикән һәмдә мәзкур тәрбийиләш хизмити уйғур елидики һәрқайси алий мәктәпләрдә елип берилидиған болуп,тәрбийиләнгүчиләр җәнубий райондин келидиған оқутқучилар икән. Хитай һөкүмити мәзкур пиланни иҗра қилиш үчүн, үрүмчи, санҗи , қаримай, қумул қатарлиқ җайлардин 400 нәпәр лаяқәтлик дәп талланған оқутқучиларни дәрс өтүшкә әвәтидикән.

Көплигән уйғур зиялийлири хитай һөкүмитиниң уйғур елидә елип бериватқан бу хил қош тиллиқ оқутқучи тәрбийиләш һәрикитини уйғур маарипини пүтүнләй чекиндүрүштин башқа нәрсә әмәс , дәп көрсәтмәктә. (Меһрибан)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.